“Brexit”, a do të largohen nga Britania e Madhe 3 milionë shtetas të BE?! Propozimi që Theresa May i bën liderëve europianë

Rreth 3 milionë shtetas të BE që jetojnë në Mbretërinë e Bashkuar do të lejohen të qëndrojnë në këtë vend edhe pas daljes së plotë nga Unioni i Britanisë së Madhe. Propozimi i ri ka ardhur nga kryeministrja e vendit Theresa May.

“Emigrantëve nga BE, të cilët kanë jetuar në Britani për 5 vite, përmes këtij propozimi të cilësuar si një “status i ri”, iu jepet e drejta për të qëndruar, për të hyrë në këtë vend për arsye shëndetësore, arsim e për përfitime të tjera”, thuhet në propozim.

Në samitin me liderët e BE, për herë të parë pas zgjedhjeve të përgjithshme, Kryeministrja May deklaroi se nuk do të donte që dikush të largohej apo siç e ka cilësuar ajo që familjet “të ndaheshin” pas këtij vendimi.

“Pozicioni i Britanisë së Madhe përfaqëson një ofertë të drejtë dhe serioze, e cila synon t’i japë sa më shumë siguri qytetarëve që janë vendosur në Britaninë e Madhe, duke ndërtuar karrierë, jetë dhe duke kontribuar aq shumë në shoqërinë tonë”, tha May.

Kryeministrja tha gjithashtu se “dëshirojmë të mbrojë të drejtat e shtetasve të BE në Mbretërinë e Bashkuar, si dhe të mbrojmë të drejtat e emigrantëve të Mbretërisë së Bashkuar në vendet e tjera evropiane”.

Kjo deklaratë e saj është pritur me kënaqësi nga liderët e BE-së. Kancelarja gjermane, Angela Merkel, vlerësoi se propozimet e zonjës May për shtetasit e BE-së në samitin në Bruksel, paraqesin “fillim të mirë” në negociatat për daljen e Britanisë nga Bashkimi Evropian, që kanë filluar këtë javë.

Osman Dedja/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.