Brexit – Hammond: Qeveria nuk ka ende mbështetjen e mjaftueshme të ligjvënësve

Qeveria britanike nuk ka ende mbështetjen e mjaftueshme të ligjvënësve për të fituar një votim parlamentar mbi marrëveshjen Brexit. Deklarata ka ardhur të dielën nga ministri britanik i Financave, Philip Hammond, ndërsa ka shtuar se një numër ‘i konsiderueshëm’ i kolegëve kanë ndryshuar pikëpamjet mbi marrëveshjen dhe po mbështesin planin e qeverisë.

Kryeministrja britanike Theresa May pritet të sjellë marrëveshjen e saj në parlament për një votim të tretë këtë javë, por Hammond tha se do të vazhdonte vetëm nëse qeveria mendonte se mund të fitonte.

I pyetur nëse qeveria kishte ende numra të mjaftueshëm, ai u përgjigj: “Jo ende, është një punë në vazhdim”.

Ligjbërësit britanikë kundërshtuan marrëveshjen e May me 149 vota gjatë votimit të zhvilluar më 12 mars.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.