Brexit mund të ndryshojë kurs – Carney: Mbështetje për ekonominë nëse dalim pa marrëveshje
Guvernatori i Bankës së Anglisë, Mark Carney, deklaroi se institucioni që ai drejton do të ofrojë më shumë mbështetje për ekonominë nëse përballet me një goditje nga një Brexit pa marrëveshje. “Siç nënvizuan edhe kolegët e mi, jo domosdoshmërisht do të veprojmë. Do të shohim efektet që mund të japë një Brexit pa marrëveshje apo pa një periudhë tranzicioni. Drejtimi i politikave monetare do të jetë në të mirë të ekonomisë”, deklaroi Carney në raportimin vjetor përpara ligjvënësve. “Duke pasur parasysh rrethanat e jashtëzakonshme që lidhen me Brexit, unë pres që Komiteti i Politikave Monetare të sigurojë çfarëdolloj mbështetje monetare”, vijoi Carney.
Kryeministrja e Britanisë, Theresa May, vijon ende përpjekjet për të arritur një marrëveshje me Bashkimin Europian, që mund të kapërcejë ndarjen e madhe me Partinë Konservatore, ndërkohë që ka mbetur edhe pak më shumë se një muaj nga data e daljes, që është 29 marsi. Mediat kanë raportuar se, May e ka përjashtuar skenarin e një dalje pa marrëveshje dhe shtyrjen e datës së daljes, duke bërë që paundi të rritet në rreth 1.32 dollarë, niveli më i lartë që nga maji i vitit 2017. Banka e Anglisë tha se, mund të rrisë normat e interesit nëse do të ketë një Brexit pa marrëveshje, pasi rënia e mprehtë e paundit do të shtojë presionet inflacioniste, siç ndodhi pas referendumit të vitit 2016. Carney tha përpara ligjvënësve se, Banka e Anglisë mund të tolerojë një inflacion më të lartë se objektivi prej 2%, por do të nevojiten edhe disa masa shtrënguese.
Ndërkohë, kjo jave duket se do të jetë shumë e rëndësishme për procesin e Brexit. E përditshmja britanike, Daily Mail, raportoi se “një grup prej 23 disidentësh u takuan fshehurazi në Dhomën e Përfaqësuesve, të hënën në mbrëmje, ku kanë diskutuar se si të parandalojnë një dalje të Britanisë pa marrëveshje më 29 mars. Për këtë arsye, nuk përjashtohet mundësia për të shtyrë afatin ose për të zhvilluar një referendum të dytë.
Lidion Kulla/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.