Brexit, përsëri në parlamentin britanik – May rikthehet nga takimi që zhvilloi në Bruksel
Parlamenti Britanik do të zhvillojë një tjetër debat për Brexit ditën e Enjte, sipas zëdhënësit zyrtar të kryeministres, James Slack. Ai tha se Theresa May do të përditësojë parlamentin me bisedimet që ajo zhvilloi me Bashkimin Europian.
Në muajin e kaluar, Parlamenti votoi kundër marrëveshjes së Theresa May, duke kërkuar që ajo të rinegociojë dhe ndryshojë masën parandaluese me Irlandën, që është një marrëveshje e përkohshme për të shmangur ashpërsimin e kufijve mes Irlandës së Veriut dhe Irlandës së Bashkimit Europian.
Masa parandaluese është kthyer në barrierën më të madhe mes Bashkimit Europian dhe Britanisë. Brukseli ka bërë të ditur se nuk do të rihapë negociatat mbi marrëveshjen e divorcit që u arrit mes dy palëve.
Bashkimi Europian këmbëngul se masa parandaluese duhet të qëndrojë deri sa të zbulohet një tjetër zgjidhje më e mirë, që do të shmangë kufijtë e ashpër pas Brexit.
Nga ana tjetër, britanikët shqetësohen se kjo masë mund të lidhë përgjithmonë Britaninë me rregullat e Bashkimit Europian, pasi nuk ka një afat kohor.
Kreu i negociatave për Brexit në BE, Michel Barnier, tha gjatë javës se Britania duhet të gjejë mënyrë për të ndërtuar një mazhorancë pozitive, mes 2 palëve negative që ekzistojnë në parlamentin britanik.
Barneri tha se masa e Irlandës është thjeshtë një politikë e sigurisë, që nuk do të ndikojë marrëdhëniet mes Britanisë dhe Bashkimit Europian në të ardhmen.
Sipas axhendës së parlamentit britanik, votimi për marrëveshjen e tërheqjes do të nisë në mes të këtij muaji. Nëse nuk arrihet një dakordësi, parlamenti do të votojë për veprimet e ardhshme.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.