Brexit shtyhet më 31 Janar 2020 – Pritet miratimi zyrtar. Nuk ka më negociata me Europën
Bashkimi Europian ra dakord në nisje të javës për të shtyrë Brexit deri më datë 31 Janar, sipas presidentit të Këshillit Donald Tusk. “Bashkimi Europian ka rënë dakord të pranojë kërkesën e Britanisë për një shtyrje fleksibël të Brexit deri më 31 Janar 2020”, tha Donald Tusk, duke shtuar se vendi mund të dalë më herët nëse parlamenti ratifikon më herët ligjin e divorcit.
Brukseli pret tashmë miratim nga Londra dhe nëse kjo ndodh, nis afati 24-orësh ku vendet anëtare mund të kundërshtojnë vendimin. Sipas zyrtarëve, kjo mund të kërkojë më shumë kohë deri ditën e Mërkurë, që është një ditë përpara afatit zyrtar të daljes së 31 Tetorit.
Vendimi erdhi pas një takimi të 27 ambasadorëve të Bashkimit Europian në Bruksel dhe pasi Franca hodhi poshtë kundërshtimet që bllokuan vendimin javën e kaluar. Shtyrja e afatit të Brexit mund të jepet vetëm në mënyrë unanime nga të 27 vendet.
Megjithatë, shtyrja e tretë vjen me disa kushte. Brukseli nuk do të ri-negociojë më marrëveshjen e divorcit dhe 27 përfaqësuesit e vendeve anëtare mund të takohen pa Britaninë për të vendosur të ardhmen e Bashkimit Europian.
Kryeministri britanik, Boris Johnson u përpoq të bindë deputetët gjatë fundjavës që të votojnë pro zgjedhjeve të parakohshme, në mënyrë që të përfundojë ngërçi politik 3 vite pas referendumit.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.