Britani, inflacioni sfidon BOE – Çmimet rriten në nivelin më të lartë në 5 vite e gjysmë

Inflacioni në Britani u rrit në nivelin më të lartë në 5 vite e gjysmë në Shtator, tregojnë të dhënat e zyrës së Statistikave, ç’ka do të bëjë që Banka e Anglisë të rrisë normat e interesit muajin që vjen.

Çmimet e konsumit  u rritën në 3% me bazë vjetore, raporton zyra kombëtare e Statistikave, duke përputhur publikimin me pritshmëritë e analistëve për rritjen më të shpejtë që prej Prill-it 2012. Në një fjalim përballë ligjbërësve në parlament, guvernatori Mark Carney, përsëriti komentet për mundësinë e rritjes së normës bazë të interesit në muajt që vijnë.  Rritja e inflacionit, e nxitur kryesisht nga rënia e paundit që prej referendumit, ka tkurrur të ardhurat e ekonomive familjare këtë vit, duke shkaktuar një tkurrje të ekonomisë, ndërkohë që pagat nuk kanë arritur ritmin e rritjes së kostove të jetesës.

“Çmimet e ushqimeve dhe kostot e transportit kanë rritur inflacionin në Shtator. Këto efekte janë kompensuar pjesërisht nga çmimet e veshjeve, që patën rritje të limituar”, deklaron zyra kombëtare e Statistikave ONS.  Muajin e kaluar, Banka e Anglisë deklaroi se e pret inflacionin sipër 3%-shit në Tetor, që ka kaluar prej kohësh objektivin e institucionit prej 2%. Në fillim të javës, shitësi me pakicë IKEA tha se ka rritur çmimet me 3% në Britani për të kompensuar për rënien e sterlinës.

Paundi ka rënë me 12% që prej referendumit kundër shportës së valutave kryesore.  Niveli bazë i çmimeve të konsumit, që heq luhatjet nga energjia dhe ushqimi, qëndroi i pandryshuar në 2.7%.  Indeksi i çmimit të prodhimit  ngadalësua në 3.3% nga 3.4% që ishte në Gusht.  Të dhëna të tjera nga zyra e Statistikave treguan se çmimet e shtëpive janë rritur me 5% me bazë vjetore për Gushtin, nga 4.5% rritje që regjistruan në Korrik.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.