Britani, Konservatorët dalin forcë e parë, por nuk “formojnë” dot shumicën në Parlament
Agjencia Reuters, më pas rrjetet britanike televizive, BBC dhe Sky News, në projektimet e tyre të bazuara në rezultatet e zgjedhjeve të përgjithshme të mbajtura dje në Britani, paralajmërojnë se Partia Konservatore e kryeministres, Theresa May do të humbasë shumicën e saj në Parlament.
“Humbja e shumicës prej 330 deputetësh, sa i kishin deri më tani konservatorët, me gjasë do të krijojë një situatë të trazuar, si dhe krijon dyshime për përpjekjet e zonjës May për forcimin e pozitës së saj në negociatat për dalje nga Bashkimi Evropian”, shkruajnë mediat.
Sot herët në mëngjes janë shpallur rezultatet për 633 vendet në Parlament, partia e kryeministres May ka fituar 308 vende dhe ajo tashmë nuk është në gjendje të arrijë shifrën prej 326 vendesh, gjë që i mundëson të ketë shumicën në parlamentin prej 650 vendeve, ka raportuar agjencia Reuters.
Rrjeti BBC ka projektuar se konservatorët do të fitojnë 318 vende, ndërsa Partia Laburiste opozitare do të ketë 267 vende deputetësh. Kjo situatë mund të krijojë “bllokim” pasi asnjë parti tjetër nuk ka fituar vota të mjaftueshme, që të përfshihet në krijimin e shumicës parlamentare.
Kryeministrja May po ballafaqohet me thirrje nga opozita dhe partia e saj që të paraqesë dorëheqjen, por ajo ka shprehur përkushtim për të qëndruar në mënyrë që të krijohet “stabilitet” për Britaninë, derisa partia e saj, me numër më të vogël deputetësh në krahasim me përbërjen e kaluar, synon të formojë qeverinë e re.
Osman Dedja/ SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.