Britania, Danimarka e Norvegjia prezantojnë masa të reja për të luftuar përhapjen e Omicron!

Rastet e COVID-19 po pushtojnë Europën edhe një herë sidomos pas shfaqjes së variantit të ri Omicron, i zbuluar për herë të parë në Afrikën e Jugut.

Qeveria daneze njoftoi të mërkurën se nxënësit e shkollave deri në klasën e 10-të duhet të studiojnë në distancë për ditët e fundit para Krishtlindjeve dhe urdhëroi që klubet e natës, baret dhe restorantet të mbyllen në mesnatë në një përpjekje për të luftuar rritjen e rasteve me COVID-19. Kryeministrja Mette Frederiksen rekomandoi gjithashtu të mërkurën që njerëzit të punojnë nga shtëpia, ndaloi koncertet me më shumë se 50 njerëz dhe urdhëroi njerëzit të mbanin maska ​​​​për fytyrën në restorante kur nuk ulen. Masat zbatohen që nga e premtja dhe janë caktuar të zgjasin për katër javë. Mësimi virtual fillon të mërkurën, më 15 dhjetor. Në Danimarkë, shkollat ​​fillojnë pushimin e Krishtlindjeve nga 20 dhjetori.

Nga e enjtja, është vendosur një kufi prej 10 personash për tubime në shtëpi private i cili hyn në fuqi për të kundërshtuar një rritje të rasteve me COVID-19 në Norvegji. Kjo është pjesë e masave të reja të shpallura në fillim të javës nga qeveria, të cilat përfshijnë edhe rifutjen e distancimit social në restorante. Pjesëmarrja në ngjarje publike pa vende të caktuara është kufizuar në 50, ndërsa njerëzve u kërkohet të punojnë nga shtëpia. Masat e reja janë caktuar të zgjasin katër javë, megjithëse numri i njerëzve të lejuar në tubime në shtëpi private do të rritet në 20 në natën e Krishtlindjeve dhe Vitit të Ri.

Kryeministri Boris Johnson njoftoi të mërkurën se Anglia do të “kalojë në planin B” dhe do të rifusë udhëzimet për të punuar nga shtëpia nga e hëna, si dhe një kërkesë për të veshur maska ​​​​për fytyrën, përfshirë ambientet e mbyllura. Një leje për COVID-19 që vërteton se mbajtësi i ka pasur të dyja dozat e vaksinës do të jetë gjithashtu e detyrueshme për të hyrë në klubet e natës dhe vendet me turma të mëdha.

Njoftimet vijnë mes frikës për variantin e ri të COVID-19 Omicron, koha e dyfishimit të të cilit në MB vlerësohet “midis dy dhe tre ditëve”, tha Johnson gjatë një konference për shtyp, duke paralajmëruar se numri i rasteve të omicron “është i sigurt se do të jetë shumë më i lartë se 568 të zbuluar deri të mërkurën.

Edel Strazimiri  / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.