Britania, Franca dhe Gjermania lëshojnë deklaratë të përbashkët për Iranin
Franca, Britania dhe Gjermania thonë se kanë frikë se marrëveshja bërthamore e Iranit 2015 është në rrezik të rrëzohet për shkak të tensioneve në rritje në Gjirin Persik. Në një deklaratë të përbashkët ata kërkuan një dialog në mes të gjitha palëve në lidhje me: “Rreziqet janë të tilla që është e nevojshme që të gjithë palët e interesuara të ndalojnë dhe të marrin në konsideratë pasojat e mundshme të veprimeve të tyre”. “Ne besojmë se ka ardhur koha për të vepruar me përgjegjësi dhe për të kërkuar mënyra për të ndaluar përshkallëzimin tensionit dhe për të rifilluar dialogun”.
Nënshkruar 4 vjet më parë, marrëveshja synonte zgjatjen e kohës që do t’i duhej Iranit teorikisht për të prodhuar materiale të mjaftueshme për një bombë atomike, e quajtur ndryshe kohë shpërthimi, nga disa muaj deri në një minimum prej një viti deri në vitin 2025. Por pasi SHBA u tërhoq nga marrëveshja majin e kaluar dhe rivendosi sanksionet mbi Iranin, Teherani tha se nuk do të respektojë disa nga detyrimet e veta.
Tensionet u rritën më tej javën e kaluar kur Britania ndaloi një cisternë iraniane jashtë brigjeve të Gjibraltarit, me dyshimin për shkelje të sanksioneve kundër Sirisë. Irani ka kërkuar që Britania të lirojë anijen dhe e mohon se po merrte naftë në Siri në kundërshtim me sanksionet e Bashkimit Europian. Ministri i Jashtëm britanik, Jeremy Hunt, i tha homologut të tij iranian të shtunën (13 korrik) se Britania do të lehtësonte lirimin e cisternës së naftës Grace 1, nëse Tehrani jep garanci se nuk do të shkojë në Siri. Ai tha se thirrja ishte konstruktive dhe Mohammad Javad Zarif i kishte thënë atij se Irani donte të zgjidhte çështjen dhe nuk po kërkonte të nxiste tensionet.
Në një fjalim televiziv të dielën, presidenti iranian Hassan Rouhani tha se Irani është gati të mbajë bisedime me Shtetet e Bashkuara nëse Washingtoni heq sanksionet dhe rikthehet në marrëveshjen bërthamore të vitit 2015. Administrata e Presidentit të SHBA, Donald Trump thotë se është e hapur për negociata me Iranin për një marrëveshje më të gjerë për çështjet e sigurisë dhe bërthamore. (Euronews)
Edel Strazimiri / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.