Britania hedh në treg monedhën e re 5 paund për të shënuar 95 vjetorin e Mbretëreshës (FOTOT)

Ditëlindja e 95-të e Mbretëreshës do të përkujtohet me një nga pesë monedhat e reja të lëshuara këtë vit, ka njoftuar Mint Mbretërore. Koleksioni britanik i monedhave 2021 do të shënojë gjithashtu 250 vjetorin e lindjes së romancierit Sir Walter Scott dhe 75 vjetorin e vdekjes së autorit HG Wells.

Lëshimi i një monedhe 5 paund zakonisht është i rezervuar për ngjarje të rëndësishme mbretërore. Në prill Mbretëresha do të bëhet monarku i parë në Mbretërinë e Bashkuar që arrin 95 vjeç. Monedha e re prej 5 paund përshkruan shifrën mbretërore “EIIR”, mbi fjalët “zemra ime dhe përkushtimi im”, një kujtesë e një pjese të fjalimit të saj të Krishtlindjeve të vitit 1957, i cili ishte i pari që u transmetua në televizion.

Gjatë këtij fjalimi, Mbretëresha i tha kombit: “Në ditët e lashta monarku udhëhoqi ushtarët e tij në fushën e betejës dhe udhëheqja e tij në çdo kohë ishte e afërt dhe personale.

“Sot gjërat janë shumë të ndryshme. Unë nuk mund t’ju çoj në betejë, nuk ju jap ligje ose vendos drejtësi, por unë mund të bëj diçka tjetër, mund t’ju jap zemrën time dhe përkushtimin tim për këto ishuj të vjetër dhe për të gjithë popujt e vëllazërimit tonë kombëtar”.

Përvjetori i lindjes së Sir Walter Scott, i cili shkroi romanet Waverley, Rob Roy dhe Ivanhoe dhe konsiderohet si një nga figurat më të famshme të Skocisë, do të festohet me një monedhë 2 paund.

75 vjetori i vdekjes së autorit të trillimeve shkencore HG Wells, i cili shkruajti vepra të tilla si Makina e Kohës dhe Lufta e Botëve, do të shënohet gjithashtu në një monedhë 2 paund, me një përshkrim të imazheve nga romanet e tij.

Përvjetori i 50-të i dhjetëzimit, kur monedhat moderne të Britanisë hynë në fuqi, do të paraqitet në një monedhë 50 peni.

75 vjetori i vdekjes së shpikësit John Logie Baird, i famshëm për prototipat e tij të hershëm të televizionit, do të përkujtohet në një tjetër monedhë të re 50 peni.

Ndërsa koka e Mbretëreshës tashmë shfaqet në njërën anë të të gjitha monedhave në qarkullim, këto pesë monedha do të ofrojnë secila një përshkrim të ndryshëm nga fazat e ndryshme të mbretërimit të saj.

Clare Maclennan, nga sektori i konsumatorëve në Royal Mint, tha se monedhat përkujtimore të këtij viti shënuan “disa nga përvjetorët më të mëdhenj në 2021”, me secilën monedhë “një vepër arti në miniaturë” të projektuar si “një kujtim ose dhuratë e çmuar”.

Seti përkujtimor do të jetë në dispozicion për t’u blerë nga faqja e internetit Royal Mint. (BBC)

Edel Strazimiri / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.