Britania humbet vrull në Shtator – Tremujori i tretë në rritje rekord përpara karantinës së re
Ekonomia britanike u rrit me një normë më të ulët se sa pritej në Shtator prej 1.1%, përpara se të aplikohej masa e re e kufizimeve të Covid-19, duke e lënë pas kombeve të tjera të pasura në rimëkëmbjen nga pandemia. Të dhënat zyrtare sugjeruan se ekonomia pritet të tkurret përsëri në fund të vitit, ndërkohë që ka ende pasiguri në lidhje me afatin e 31 Dhjetorit për një marrëveshje të Brexit. Në tremujorin e tretë të plotë, Produkti i Brendshëm Bruto u rrit me një normë rekord prej 15.5%. Megjithatë, dështoi të rikuperojë thuajse 20% të rënies në tremujorin e dytë, ku përfshihej dhe karantina e parë e koronavirusit.
Ekonomia po merr mbështetje nga mbi 200 miliardë paund shpenzime emergjencë dhe ulje tatimore. Pavarësisht këtyre përpjekjeve, Britania, që ka kaluar 50,000 të vdekur nga Covid-19, është vendi më i goditur ekonomikisht se çdo ekonomi tjetër e madhe. Ekonomistët thonë se kjo vjen pasi masat fillestare të karantinës zgjatën më shumë se në vendet e tjera dhe lanë një gjurmë të ashpër tek shërbimet, që përbëjnë 80% të ekonomisë. PBB qëndron ende 10% më e vogël krahasuar me tremujorin e katërt 2019, një rënie sa dyfishi i Italisë, Gjermanisë apo Francës. Banka e Anglisë parashikoi se ekonomia e 6 më e madhe pritet të tkurret me një normë rekord prej 11% në vitin 2020.
Klevis Llaha/ SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.