Britania jashtë bashkimit doganor – Bizneset nuk janë përgatitur për vonesa në dërgesat e mallrave
Porti me aktivitetin më të madh të Europës paralajmëroi bizneset britanike se duhet të përgatitet për vonesa të mundshme të dërgesave pas Brexit, për shkak se 1 në 3 firma nuk kanë bërë plane për ndryshimet doganore pas Marsit 2019. Një sondazh i Portit të Doverit dhe Dhomave Britanike të Tregtisë, zbuloi se 33% e bizneseve nuk kanë bërë plane për ndryshime të mundshme të kontrollit në dogana mes Mbretërisë së Bashkuar dhe Bashkimit Europian.
Qeveria ka bërë të ditur se Britania do të dalë nga bashkimi doganor, që lejon lëvizjen e lirë të mallrave mes bllokut. Porti i Doverit manaxhon thuajse 17% të tregtisë në mallra të Britanisë, që arrin vlerën e 122 miliardë paund. Thuajse 1/3-a e kompanive kanë bërë të ditur se pritet të ndikohen pas Brexit, prej vonesave në portet britanike apo europiane.
Sipas Dhomave Britanike të Tregtisë (BCC), firmat duhet të jenë të informuara mbi kontrollet që do të përballen në lidhje me tregtinë me Bashkimin Europian dhe duhet të nisin planet e tyre. Mungesa e detajeve mbi kushtet e marrëveshjes përfundimtare me Bashkimin Europian e vështirëson këtë proces.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.