Britania, më e madhe se përpara pandemisë – Ekonomia kalon nivelin e Shkurtit 2020 pas një fuqizimi në Nëntorin e kaluar
Ekonomia britanike është fuqizuar në Nëntor duke kaluar më në fund përmasën që kishte përpara se vendi të aplikonte karantinën e parë të Covid-19, sipas të dhënave zyrtare. Ekonomia e pestë më e madhe në botë është rritur me një normë më të shpejtë se sa pritej prej 0.9% në Nëntor, përpara valës së fundit të Omicron , duke e bërë përmasën totale 0.7% më të madhe se sa ishte në Shkurt 2020, sipas zyrës së Statistikave në Londër.
“Është e mahnitshme që të shohim që përmasa e ekonomisë është rikthyer në nivelet e para pandemisë, që është një dëshmi e guximit dhe vendosmërisë të popullit britanik”- tha ministri i Financave Rishi Sunak. Ekonomi të tjera janë rimëkëmbur prej kohësh nga përmasa e para pandemisë, ku ndër to kryesojnë Shtetet e Bashkuara. Ekonomia britanike u tkurr me mbi 9% në vitin 2020, që është një nga rëniet më të mëdha nga pandemia tek vendet më të pasura në botë.
Pavarësisht rritjes në muajin Nëntor, PBB me shumë mundësi ka marrë një goditje të re në Dhjetor, kur varianti Omicron përfshiu Europën. Humbja e vrullit pritet të ketë zgjatur edhe në Janar, ku shumë firma raportuan mungesa gjigante në staf. Megjithatë, zyrtarët e shëndetësisë mendojnë se infeksionet me Omicron kanë arritur majën në Britani dhe sipas analistëve, goditja tek ekonomia pritet të jetë afat-shkurtër, duke lejuar Bankën e Anglisë që të vazhdojë me rritjen e normës bazë të interesit këtë vit. Zyra e Statistikave theksoi se PBB me bazë tremujore do të arrijë apo kalojë nivelin e para pandemisë në periudhën Tetor Dhjetor 2021, për sa kohë që prodhimi ekonomik nuk bie me mbi 0.2% në Dhjetor.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.