“Britania, në telashe serioze” – Mjekët paralajmërojnë për krizë të ashpër, nëse qeveria nuk vepron

Një numër në rritje i mjekëve në Mbretërinë e Bashkuar po paralajmërojnë se vendi dhe shërbimi shëndetësorë, po përballet me një krizë të re, për shkak të infeksioneve të mëdha me Covid-19 dhe rritjes së numrit të shtrimeve në spital dhe vdekjeve.  Paralajmërimet, nga disa organe të mëdha mjekësore në Britani gjatë ditëve të fundit, vijnë ndërkohë që qeveria ka këmbëngulur se disa kufizime të tjera ndaj jetës publike nuk janë të nevojshme, pavarësisht se Sekretari i Shëndetësisë, Sajid Javid, tha se rastet mund të arrijnë në 100,000 në ditë, në periudhën e Dimrit.

Duke përkeqësuar situatën, ekspertët në Britani po monitorojnë një mutacion të variantit Delta, që mund ta bëjë virusin akoma më të transmetueshëm. Shoqata Mjekësore Britanike kritikoi ashpër perspektivën optimiste të qeverisë, duke thënë se situata është “jashtëzakonisht shqetësuese”, ndërkohë që “Javid nuk është i gatshëm të ndërmarrë veprime për të shpëtuar jetë dhe Shërbimin Kombëtar të Shëndetit”.

Sindikata e doktorëve mbështeti gjithashtu thirrjet e bëra më parë nga konfederata e Shërbimit kombëtar të Shëndetësisë, që qeveria të aktivizoi planin B, që premtoi ta bëjë nëse rastet kërcënojnë aftësinë e shërbimeve mjekësore për të funksionuar. “Realiteti sot është një normë e papranueshme e infeksioneve, shtrimeve në spitale dhe vdekjeve, që nuk janë dëgjuar në vende homologe europiane. Në krahasim me Francën, ne kemi mbi 10 herë më shumë raste dhe thuajse 4 herë më shumë vdekje për milionë banorë”- deklaroi Shoqata Mjekësore Britanike.

Klevis Llaha / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.