Britania pranon “gjobën”- Për herë të parë pohon se për Brexit duhet të paguajë
Mbretëria e Bashkuara ka pranuar për herë të parë se do t’i duhet t’i paguajë Bashkimit Europian një faturë të kripur për Brexit. Përgjatë një viti, Britania e ka mohuar vazhdimisht këtë fakt.
“Qeveria ka qenë e qartë se ne do të punojmë më Bashkimin Europian për të arritur një marrëveshje të drejtë. Qeveria e kupton se Britania ka detyrime ndaj Bashkimit Europian dhe unioni karshi Britanisë”, deklaroi Joyce Anelay, ministër për Brexit, duke iu referuar qartësisht detyrimeve financiare.
Fatura e Brexit ka qenë një ndër elementët më spekulativë gjatë këtij vitit. Mediat kanë folur vazhdimisht për një shumë që mund të shkojë deri në 100 miliardë euro. Gjithsesi, asnjë nga palët nuk ka folur ende me shifra.
Disa muaj më parë, kryeministri i Luksemburgut, Xavier Bettel, deklaroi se, kjo faturë do të jetë mes 40 dhe 60 miliardë eurove. Ajo që është e sigurt është fakti se, gjoba e Brexit do të jetë e majme dhe do të sjellë kosto në financat britanike.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.