Britania “shet” dasmën – Shitje masive të produkteve që simbolizojnë dasmën mbretërore

Dasma Mbretërore mes Princit Harry dhe aktores Meghan Markle është lajmi kryesor i kësaj fundjave, jo vetëm në Mbretërinë e Bashkuar, por në thuajse çdo cep të botës.

Britania e ka kthyer dasmën në një markë, duke korrur përfitime të majme nga evenimenti. Nëpër dyqanet e suvenireve, produktet më të shitura këto ditë kanë qenë ato të dasmës. Produktet janë nga më të ndryshmet, që nga suvenirët humoristikë e deri te produktet për t`u ngrënë.

Peshqirët e çajit ndërkohë janë ndër më të shiturat gjatë këtyre ditëve, pasi janë deri diku edhe një simbol i Mbretërisë. Shitje mjaft të larta po raportojnë edhe dyqanet online.

Fansat nga çdo cep i botës kanë nxituar që të blejnë diçka sado të vogël, si kujtim nga dasma mbretërore mes Princit Harry dhe aktores kanadeze. Madje, një prej dyqaneve online ka shkuar deri aty sa ofron opsionin e shitjes së shisheve bosh, ose më saktë të mbushura  me ajër nga dasma mbretërore.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.