Britania tashmë ka një ministre për vetminë – Studimet, një nga shkaqet e vdekjeve të hershme

Studimet e mëparshme e kanë lidhur vetminë me vdekjet e hershme në të gjitha vendet e pasura. Në kuadër të kësaj, qeveria britanike ka emëruar politikanen Tracey Crouch si ministre për të trajtuar problemin e vetmisë. Kjo mendohet të ndikojë te rreth nëntë milionë njerëz në Britaninë e Madhe.

Sipas të dhënave, rreth 200 mijë njerëz të moshuar nuk kanë pasur asnjë bisedë me një mik apo të afërm në më shumë se një muaj. Bazuar te vlerësimet, gjysma e njerëzve të moshës 75 vjeç e lart që janë rreth 2 milionë njerëz anembanë Anglisë, jetojnë vetëm, ndërsa rreth 85 për qind e të rinjve me aftësi të kufizuara ndihen të vetmuar.

Shumë prej tyre mund të kalojnë ditë ose javë pa asnjë ndërveprim shoqëror. Ndërsa në SHBA, një e treta e qytetarëve kategorizohen si të vetmuar.

“Për shumë njerëz, vetmia është realiteti i trishtuar i jetës moderne. Unë dua të ballafaqohem me këtë sfidë për shoqërinë tonë dhe për të gjithë ne që të ndërmarrim veprime për të adresuar vetminë e duruar nga të moshuarit, kujdestarët, nga ata që kanë humbur të dashurit, njerëz të cilët nuk kanë askënd për të biseduar apo për të ndarë mendimet apo përvojat e tyre”, tha kryeministrja Theresa May në një deklaratë.

Ndërkohë, studimet e vitit 2017 arritën në dy konkluzione të rëndësishme: lidhja më e madhe sociale u shoqëruar më një rrezik 50 për qind në rënie të vdekjeve të hershme dhe efekti i vetmisë kishte një efekt në rrezikun e vdekjes së të rinjve të barabartë me atë të obezitetit.

Komisioni i ngritur vitin e kaluar po punon me një sërë organizatash bamirësie të fokusuara te grupet e rrezikut, duke përfshirë të moshuarit, refugjatët, të rinjtë dhe prindërit e rinj.

G.D/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.