Britanikët bëhen gjermanë – Në 1 vit rritet me 500% numri i atyre që ndërruan shtetësinë
Gjermania nuk është parajsa vetëm e shqiptarëve, ballkanasve, apo refugjatëve. Që prej referendumit të Qershorit të vitit ta kaluar, një numër rekord britanikësh po largohet drejt Gjermanisë.
Gjatë 2016-ës, autoritetet gjermane i kanë dhënë nënshtetësi 2865 shtetasve britanikë, ndërkohë që në vitin 2015, kjo shifër fiksohej në vetëm 600. Pra kemi të bëjmë me një rritje prej thuajse 500%.
Ekspertët argumentojnë se, ky numër mund të rritet ndjeshëm, edhe më tej, pas largimit formal të Britanisë nga Bashkimi Europian. Të dhënat janë zyrtare, dhe janë publikuar nga zyra federale e statistikave të Gjermanisë.
Pjesa dërrmuese e atyre që kanë marrë pasaportën gjermane, janë shtetas që jetonin edhe më parë në Gjermani, por që janë nxitur të aplikojnë për shtetësi pas referendumit për Brexit.
Një pjesë e madhe e britanikëve nuk duan të rrezikojnë duke pritur negociatat për Brexit. Mes ekonomive më të mëdha të Europës, vetëm italianët, me 3500 nënshtetësi i`a kalojnë britanikëve.
Në total, gjermania ka natyralizuar 110.400 të huaj gjatë vitit të kaluar. Në vend të parë janë turqit, të ndjekur nga polakët, ukrainasit, shqiptarët e Kosovës dhe rumunët. Britanikët ndërkohë janë të dhjetët.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.