Britanikët votojnë – Momenti i së vërtetës, mbretëria në fokus
Britanikët i drejtohen sot kutive të votimit për të zgjedhur mazhorancën e re qeverisëse. Sondazhet e fundit flasin për një rezultat të ngushtë, që mund të prodhojë edhe mungesën e një mazhorancë në gjendje për të krijuar një qeveri, apo aq më keq të negociojë me Bashkimin Europian marrëveshjen për Brexit.
Pikërisht kjo pasiguri ka krijuar ankth edhe në tregje, gjë që do të vihet re të nesërmen e votimit dhe me hapjen e tregjeve aziatike, që do të jenë të parat pas rezultatit të zgjedhjeve.
“Babai im më ka dhënë një këshillë kur unë isha 15 vjeç; asnjëherë mos voto pro, por voto kundër”-shprehet një votues britanik.
“Jeremy Corbin është i drejtë, i ndershëm dhe kujdeset për të gjithë. Unë i dua laburistët dhe shpresoj që sot të marrim një qeveri laburiste”-shprehet një votues tjetër.
“Europa, unë votova për të qëndruar në Europë, dhe kjo nuk funksionoi. Unë duhet të votoj dikë, kështu që zgjidha Corbin, pasi jam një fans i Tony Blair”-shprehet dikush tjetër. Ka edhe nga ata që duken të pakënaqur me të gjithë.
“Nuk ishte aspak e thjeshtë, pasi nuk ka asnjë për të cilin do të doja të votoja”-shprehet një tjetër votuese.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.