Bruksel, Rama takon homologun grek Tsipras – Diskutojnë për zgjidhjen e problematikave të trashëguara nga e kaluara
Në kuadër të Samitit të NATO-s në Bruksel, kryeministri Edi Rama zhvilloi një takim me homologun grek Alexis Tsipras, ku të pranishëm ishin edhe dy ministrat e Jashtëm, Bushati dhe Kotzias. Dy kryeministrat nënvizuan natyrën dhe rëndësinë strategjike të marrëdhënieve shqiptaro-greke dhe rolin e miqësisë mes të dy popujve si ure paqeje e stabiliteti në mbarëvajtjen e integrimit euro-atlantik të rajonit.
Kryeministrat diskutuan mbi ecurinë e marrëdhënieve dypalëshe dhe shprehën mbështetjen e tyre ndaj iniciativës së dy ministrave të Jashtëm, për një mekanizëm konsultimesh intensive me qëllim gjetjen e zgjidhjeve për problematikat e trashëguara nga e kaluara. Palët nënvizuan rolin e posaçëm të komunitetit shqiptar në Greqi, si dhe vlerësuan hapat e rëndësishme të ndërmarra për integrimin social dhe ekonomik të shqiptarëve në shtetin helen.
Rama theksoi nevojën e përparimit drejt gjetjes se zgjidhjeve për mosmarrëveshjet ekzistuese midis dy vendeve, në respekt të praktikave më të mira evropiane dhe të së drejtës ndërkombëtare. “Greqia na ka mbështetur dhe dëshirojmë qe të vijojë të jetë një mbështetëse e fortë në procesin e anëtarësimit të Shqipërisë në BE”, tha zoti Rama.
Kryeministri Tsipras shprehu mbështetjen e fortë të Greqisë ndaj reformave shtet-konsoliduese në Shqipëri si dhe rëndësinë që ai i kushton respektimit të të drejtave të pakicës greke në vendin tonë.
Palët ranë dakord se vetëm gjetja e zgjidhjeve konkrete me impakt të drejtpërdrejtë në rritjen e mirëqenies se te dy popujve, do të forcojë mirëbesimin midis dy shteteve dhe do të na largojë nga retorikat konfliktuale e ngërçet e të shkuarës.
Osman Dedja/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.