BSH analizon ekonominë: “Çdo politikë e jona dhe parashikim, në kushtet kur nuk do të ketë mbyllje tjetër”

Banka e Shqipërisë ka publikuar raportin më të fundit të politikës monetare për tremujroin e fundit të vitit. “ Informacioni i marrë në analizë në këtë raport tregon se aktiviteti ekonomik ka ardhur në përmirësim gjatë muajve të verës, pas rënies së fortë të shënuar në tremujorin e dytë. Ky rikuperim pasqyroi lehtësimin e masave të distancimit social dhe mbështetjen e siguruar nga stimuli i gjithanshëm fiskal, monetar e makroprudencial.

Megjithatë, pavarësisht tendencave pozitive, perspektiva e rikuperimit të ekonomisë në të ardhmen mbetet ende e brishtë. Vala e re e infektimeve dhe prezantimi i masave kufizuese në shumë vende, e potencialisht dhe në Shqipëri, paraqesin sfida serioze për shëndetin publik dhe për ecurinë e ekonomisë gjatë periudhës në vijim”-nënvizoi Guvernatori i bankës, Gent Sejko në prezantimin e raportit. “Në këtë kontekst, Këshilli Mbikëqyrës i Bankës së Shqipërisë vlerëson se qëndrimi aktual i politikës monetare mbetet i përshtatshëm.

Kushtet monetare dhe normat e ulëta të interesit ofrojnë mbështetjen e duhur për rritjen ekonomike dhe për kthimin e inflacionit në objektiv brenda vitit 2022”-shtoi ai. Institucioni vlerëson se pandemia ka dhënë një ndikim të fortë negativ në ekonominë shqiptare dhe se pasojat e saj janë materializuar qartë në treguesit kryesorë; masat e distancimit social dhe rritja e pasigurisë kanë sjellë tkurrjen e fortë të aktivitetit ekonomik, reduktimin e punësimit dhe rënien e inflacionit.

“Skenari bazë i zhvillimeve të pritura është ndërtuar mbi supozimin e shmangies së masave ekstreme për kontrollin e përhapjes së një vale të dytë të pandemisë dhe reduktimin gradual të pasojave të saj. Në këtë skenar, ekonomia shqiptare pritet të shënojë një rënie të ndjeshme për vitin 2020 dhe norma relativisht të shpejta dhe të qëndrueshme rritjeje në vijim”-thuhet më tej.

Roel Korkuti / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.