BSH flet për rimëkëmbje graduale të ekonomisë – “Perspektiva ekonomike në përmirësim, falë konsumit, investimeve dhe eksporteve”
“Rimëkëmbja ekonomike në Shqipëri po vazhdon me ritme më të larta sesa pritej, duke treguar për një rezistencë më të larë të ekonomisë sonë ndaj goditjes dhe një reagim më të mirë ndaj masave stimuluese. Të gjithë komponentët e kërkesës agregate njohën rritje, por investimet publike ishin komponenti me kontributin më pozitiv. Të dhëna indirekte flasin për vijimin e rikuperimit të aktivitetit ekonomik në tremujorin e parë të vitit 2021”-nënvizon Banka e Shqipërisë në raportin më të fundit të politikës monetare për tremujorin e dytë të vitit. “Megjithë përmirësimin e vërejtur, efektet ekonomike të pandemisë janë ende evidente sikurse ilustrohet nga nivelet e ulëta të kërkesës, prodhimit dhe punësimit, në raport me vitin 2019. Kështu, gjatë vitit 2020, ekonomia gjeneroi 3.3% më pak prodhim dhe të ardhura, dhe 3.4% më pak punësim, ndërsa shkalla e papunësisë u rrit në 11.8%. Këto kushte u pasqyruan në rritjen e dobët të pagave dhe të kostove të tjera të prodhimit, në rënien e marzheve të fitimit të biznesit dhe, së fundmi, në rritjen e ngadaltë të çmimeve të konsumit. Inflacioni vijon të luhatet nën objektivin e bankës qendrore prej 3%. Nga ana tjetër, inflacioni bazë, i cili shmang këto luhatje, rezultoi i qëndrueshëm, rreth nivelit 1.5%. Inflacioni pritet të rritet ngadalë në vijim, duke ndjekur me një vonesë kohore përmirësimin e kërkesës dhe rritjen e çmimeve në vendet partnere”-thuhet më tej në raport.
“Perspektiva ekonomike për ekonominë shqiptare ka ardhur në përmirësim. Ky përmirësim faktorizon fleksibilitetin e deritanishëm të ekonomisë për t’iu përshtatur kushteve të reja, mbështetjen e vazhduar me politika ekonomike stimuluese, dhe rritjen e imunitetit të popullsisë, në linjë me vazhdimin e programeve të vaksinimit. Parashikimet e Bankës së Shqipërisë tregojnë për rritjen e pandërprerë të aktivitetit ekonomik gjatë viteve 2021-2023. Përfundimi gradual i efektit të pandemisë do t’i hapë rrugë normalizimit të aktiviteteve ekonomike, të cilat do të vazhdojnë të përfitojnë nga kushtet e favorshme të financimit, dhe nga rimëkëmbja e kërkesës së brendshme dhe asaj të huaj. Rritja ekonomike pritet të jetë me bazë të gjerë, e mbështetur nga rritja e konsumit, investimeve dhe eksporteve. Ajo do të shoqërohet, në njëra anë, me rritjen e shitjeve dhe të të ardhurave të sektorëve të ekonomisë dhe me shëndoshjen e financave të tyre dhe, në anën tjetër, me rritje të punësimit dhe të pagave. Kombinimi i këtyre faktorëve do të shtojë presionet për rritjen e çmimeve të konsumit drejt objektivit tonë. Inflacioni parashikohet të luhatet rreth nivelit 1.5% për vitin 2021 dhe të rritet në 3.0% brenda vitit 2022”-nënbizon institucioni sa i përket perspektivës për të ardhmen afat-shkurtër dhe afat-mesëm.
“Këshilli mbikëqyrës vlerëson se nxitja e një rritjeje ekonomike të qëndrueshme dhe kthimi i inflacionit në objektiv kërkon ruajtjen e kahut stimulues të politikës monetare. Kjo do të realizohet duke mbajtur normën bazë të interesit poshtë nivelit ekuilibër në horizontin afatmesëm”-thuhet më tej.
Roel Korkuti / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.