Paraja, e lirë edhe në 2018 – Sejko: Normat e interesit nuk rriten as vitin tjetër
Epoka e normave të ulëta të interesit në ekonominë shqiptare pritet të zgjasë edhe vitin e ardhshëm.
Guvernatori i Bankës së Shqipërisë, Gent Sejko, tha të mërkurën se zhvillimet e muajve të fundit kanë treguar se potencialet e rritjes ekonomike janë më të larta nga vlerësimet e mëparshme. Kjo do të thotë se kthimi i rritjes ekonomike në potencial dhe i inflacionit në objektiv do të kërkojë më shumë kohë. Sejko paralajmëroi që inflacioni do të kthehet pranë nivelit 3% në vitin 2019, ndërsa norma bazë e interesit nuk pritet të rritet para fundit të vitit të ardhshëm.
Këshilli Mbikëqyrës i Bankës së Shqipërisë mbajti sot të pandryshuar normën bazë të interesit në nivelin 1.25%. Megjithatë, Guvernatori përsëriti edhe njëherë gatishmërinë e Bankës Qendrore për të ulur më tej normën bazë të interesit, nëse inflacioni nuk do të ketë rritje nga nivelet e tremujorit të tretë të këtij viti.
Banka e Shqipërisë shprehu edhe një optimizëm për gjendjen e sektorit financiar në vend. Kreditë me probleme për shtatorin ranë sërish në 14.78%, niveli më i ulët që nga marsi 2011. Sipas Guvernatorit, bankat duhet të ndjekin politika më të favorshme për kreditimin e sektorit privat, për të mos u bërë pengesë në ciklin e rimëkëmbjes ekonomike.
Në tremujorin e tretë të vitit, kreditimi po jep sinjale të rëndësishme përtëritjeje, e udhëhequr sidomos nga rritja e kredisë në lekë. Siç theksoi edhe Guvernatori Sejko, në muajt e fundit vërehet një rritje e kredisë për biznesin e madh, çka tregon se bilancet e sipërmarrjes private janë në përmirësim dhe kërkesa për kredi është në rritje.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.