BSH nuk do ndërmjetësojë më shitjen e titujve – Do ia kalojë këtë kompetencë tërësisht bankave tregtare brenda vitit 2020

Banka e Shqipërisë parashikon që deri në fund të vitit 2022 të mbyllë gradualisht aktivitetin e ndërmjetësimit në blerjen dhe administrimin e llogarive të titujve shtetërorë për individët, duke ia kaluar tërësisht këtë aktivitet bankave të nivelit të dytë që operojnë në vendin tonë, sqaron vetë institucioni, që e ka përfshirë këtë si pjesë të objektivave të saj deri në vitin 2022. Ky vendim vjen në kuadër të nxitjes së zhvillimeve në tregun e brendshëm financiar.

“Rritja e aktivitetit ndërmjetësues të bankave në pjesëmarrjen e individëve në ankandet primare të titujve shtetërorë do të ndihmojë në zgjerimin e bazës së klientëve që marrin shërbime bankare, si dhe në forcimin e lidhjeve klientë-bankë, në këndvështrimin e rritjes së aktivitetit të tregut sekondar të shitjes me pakicë të titujve”-nënvizon institucioni.

Aktualisht, individët mund të blejnë tituj shtetëror në nëpërmjet Bankës së Shqipërisë, si dhe nëpërmjet bankave të nivelit të dytë. Titujt shtetërorë, obligacione dhe bono thesari, që prej vitit 2023, duket se nuk do të mund të blihen më nga individët nëpërmjet Bankës së Shqipërisë, por vetëm nëpërmjet bankave tregtare që operojnë në vendin tonë.

Roel Korkuti / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.