BSH nuk ndryshon normat e interesit, Minxhozi: “Në tremujorin e dytë ekonomia humbi 50 mijë vende pune”
Rimëkëmbja e ekonomisë shqiptare mbetet e paqartë, gjatë muajve në vijim për shkak të rritjes së infektimeve me Covid-19. Në konferencën periodike për mediat të Bankës së Shqipërisë, këtë herë ishte zëvëndësguvernatorja e parë, Luljeta Minxhozi, pasi Guvernatori Gent Sejko ka rezultuar pozitiv me koronavirus. Gjatë fjalës së saj, Minxhozi njoftoi se kushtet aktuale monetare ofrojnë mbështetjen e duhur për ekonominë.
“Megjithatë, pavarësisht tendencave pozitive, perspektiva e rikuperimit të ekonomisë në të ardhmen mbetet ende e brishtë. Vala e re e infektimeve dhe prezantimi i masave kufizuese në shumë vende, e potencialisht dhe në Shqipëri, paraqesin sfida serioze për shëndetin publik dhe për ecurinë e ekonomisë gjatë periudhës në vijim. Në këtë kontekst, Këshilli Mbikëqyrës vlerësoi se qëndrimi aktual i politikës monetare mbetet i përshtatshëm. Kushtet monetare dhe normat e ulëta të interesit ofrojnë mbështetjen e duhur për rritjen ekonomike dhe për kthimin e inflacionit në objektiv brenda vitit 2022.”
Sa i përket efekteve të pandemisë në ekonominë shqiptare, Minxhozi tha se gjatë tremujorit të dytë të vitit, kur ishin në fuqi masat e karantinës, ekonomia shqiptare humbi rreth 50 mijë vende pune.
“Sipas të dhënave të Instat-it, prodhimi i brendshëm bruto ra me 10.2% në tremujorin e dytë të vitit, duke shënuar tkurrjen më të fortë në historinë shqiptare të dy dekadave të fundit. Ky kontraktim rezultoi me bazë të gjerë në shpërndarjen sektoriale dhe strukturën e kërkesës agregate, por ai pasqyroi më së shumti tkurrjen e konsumit privat dhe të aktivitetit në sektorin e shërbimeve. Në të njëjtin tremujor, ekonomia shqiptare humbi rreth 50 mijë vende pune dhe shkalla e papunësisë u rrit në nivelin 11.9%. Megjithatë, paketat ndihmëse fiskale kanë amortizuar disi situatën e vështirë në tregun e punës. Për rrjedhojë, si rënia e punësimit dhe rritja e papunësisë kanë qenë më të zbutura se ecuria e treguesve të aktivitetit ekonomik.”
Skenari bazë i zhvillimeve të pritshme nga Banka e Shqipërisë është ndërtuar mbi supozimin e shmangies së masave ekstreme për kontrollin e përhapjes së një vale të dytë të pandemisë. në mbyllje të takimit të nëntorit, Këshilli Mbikëqyrës i BSH vendosi të lerë të pandryshuar normën bazë të interesit në nivelin 0.5%, interesin për depozitat në 0.1% dhe interesin e kredive njëditore në 0.9%.
Lidion Kulla / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.