BSH shtyn masat e pandemisë – Deri më 31 mars lehtësimet për kreditë, pezullohet deri në fund të vitit shpërndarja e dividentit

Në mbledhjen e fundit, këshilli Mbikëqyrës i Bankës së Shqipërisë ka vendosur të shtyjë disa prej masave të marra si pasojë e krizës së shkaktuar nga pandemia. Një prej masave, e cila shtyhet deri më 31 mars të këtij viti është edhe ajo e mënyrës së klasifikimit dhe provigjionimit të kredive të ristrukturuara deri më 31 mars të 2021. “Kështu kreditë e ristrukturuara deri në 31 mars 2021 mund të ruajnë të njëjtin klasifikim dhe provigjioninim me ato para provigjionimit”-nënvizon Banka e Shqipërisë në vendimin e Këshillit Mbikqyrës.

Edhe data e hyrjes në fuqi të vendimit nr. 53, datë 02.09.2020 “Për disa ndryshime në rregulloren “Për administrimin e rrezikut nga ekspozimet e mëdha të bankave” shtyhet në datën 1 Janar 2022. Një tjetër masë është edhe ajo e pezullimit të shpërndarjes së fitimit për vitin 2020 nga ana e bankave, por edhe fitimet e realizuara për vitin 2021. Kjo masë do të qëndrojë në fuqi deri më datë 31 dhjetor të këtij viti, ka vendosur këshilli mbikqyrës i Bankës së Shqipërisë.

Banka e Shqipërisë, gjatë vitit 2020, ndërmori një tërësi masash për shkak të situatës pandemike COVID-19, që lidheshin me ndryshime rregullative dhe vendimarrje të saj mbi administrimin e rrezikut të kredisë, të procesit të ristrukturimit dhe provigjionimit të kredisë, të administrimit të rrezikut që rrjedh nga ekspozimet e mëdha, dhe për pezullimin e shpërndarjes së fitimeve të akumuluara dhe atyre ushtrimore.

Këshilli Mbikëqyrës vendosi gjithashtu dhënien e miratimit paraprak për zotërimin e 100 për qind të kapitalit aksionar të Bankës Alpha Albania sh.a. nga Alpha International Holdings Single Member S.A., Greqi” .

Roel Korkuti / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.