BSH: Ulen rreziqet për ekonominë – “Sektori bankar, i shëndetshëm, me nivele të përshtatshme likuditeti dhe kapitalizimi”
Raporti i Bankës së Shqipërisë për stabilitetin financiar për 6-mujorin e parë të vitit nënvizon se, veprimtaria e sektorit bankar u zhvillua në mënyrë të qëndrueshme. “Depozitat dhe kreditë u rritën, cilësia e kredisë u përmirësua ndjeshëm , dhe treguesit e tjerë të qëndrueshmërisë financiare mbetën në nivele të përshtatshme. Në tërësi, eskpozimi i sektorit bankar ndaj rreziqeve u paraqit i kontrolluar. Përmirësimi i situatës shëndetësore mbështeti një rigjallërim të shpejtë të aktivitetit ekonomik. Përvoja e kësaj periudhe, tregon se përshpejtimi i procesit të vaksinimit mbetet i rëndësishëm për të zbutur pasiguritë që ecuria e pandemisë ende ruan mbi zhvillimet e ardhshme ekonomike dhe financiare. Njëherazi, këto pasiguri evidentojnë nevojën që politikat ekonomike, financiare dhe prudenciale të ruajnë elementët e fleksibilitetit për të reaguar në rast nevoje. Për sektorin bankar, mbetet aktuale rëndësia e vlerësimit të rregullt të shkallës së ekspozimit ndaj rreziqeve, dhe e ruajtjes së një qëndrimi proaktiv në drejtim të marrjes së masave për zbutjen dhe përballimin e tyre”-nënvizon banka e Shqipërisë në raportin periodic, i cili publikohet dy herë në vit.
“Gjatë periudhës sektori bankar ruajti një nivel të përshtatshëm të kapitalizimit. Norma e mjaftueshmërisë së kapitalit shënoi rreth 8% (17.95%), me rënie në dy periudhat e fundit. Në ecurinë e treguesit gjatë periudhës, ndikoi kryesisht rritja e aktiveve të peshuara me rrezik e cila tejkaloi efektin e rritjes së kapitalit rregullator. Bankat me kapital evropian dhe bankat sistemike raportojnë nivelin më të lartë të normës së mjaftueshmërisë së kapitalit”-vijon ndër të tjera institucioni qëndror i politikës monetare në vend.
“Në tërësi, rreziqet për ekonominë Shqiptare kanë qenë të kontrolluara gjatë periudhës. Harta e stabilitetit financiar tregon një nivel më të ulët të rreziqeve në mjedisin e përgjithshëm makroekonomik dhe për agjentët e ekonomisë reale, ndërsa rreziqet që lidhen me veprimtarinë bankare mbeten në nivele të kontrolluara, pavarësisht situatës së pazakontë të vitit të kaluar. Kontributin kryesor në këtë ecuri e ka dhënë përmirësimi i gjendjes financiare të ndërmarrjeve, të familjeve dhe të mjedisit të jashtëm, ndërsa faktorët e tjerë që lidhen me ecurinë e përgjithshme të ekonomisë, të situatës fiskale dhe të ecurisë së veprimtarisë bankare kanë shfaqur ndryshime të vogla dhe jopërcaktuese”-thekson Banka e Shqipërisë në raport sa i përket rreziqeve që i kanosen ekonomisë shqiptare.
Roel Korkuti / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.