Buffett “godet” sërish – Blerja e tretë më e madhe, $17.5 mld për “Oncor”

Warren Buffet nuk di të mos jetë protagonist. Pasi mori rreth 13 miliardë dollarë fitime në formë dividendi nga Bank of America një javë më parë, për t’i rinvestuar në rritjen e kuotave të tij te kjo bankë, Orakulli i Omahas është drejt  një tjetër blerje të çmendur.

Është drejt finalizimit marrëveshja për të blerë gjigantin amerikan të elektricitetit “Oncor”, për një vlerë prej 17.5 miliardë dollarësh. Ky operacion do ti japë mundësinë Berkshire Hathaway që kontrollohet nga miliarderi që të rrisë kuotat që ka në këtë sektor.

Kjo do të jetë blerja e tretë më e madhe e Berkshire në të gjithë historinë, madje edhe më e madhe se ajo e vitit 2013, kur bleu për 12 miliardë dollarë gjigandin ushqimor Heinz.

Warren Buffett njihet për stilin e tij të veçantë të të bërit biznes, pasi ka një portofol mjaft të diversifikuar investimesh e që ka rezultuar i suksesshëm, për njeriun që herë ngjitet në vendin e dytë të njerëzve më të pasur të botës e herë zbret në vend të tretë.

Buffett është njeriu i vetëm që ka kuota mazhorance në dy bankat më të mëdha amerikane. Ai ka gjithashtu aksione në 4 kompanitë më të mëdha ajrore në vend, në rrjetin gjigand të supermarketeve Wal Mart, në disa kompani të tjera ushqimore, në sektorin e naftës e atë të elektricitetit, etj.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.