Bujqësia dhe blegtoria në Tiranë, mbizotërojnë ullinjtë, rrushi dhe shpendët – Ja njësitë që dallojnë

Tirana mund të jetë qendra e aktivitetit ekonomik në Shqipëri, por kjo nuk e përjashton atë nga tradita e bujqësisë dhe blegtorisë. Pavarësisht se vetëm 7.2% e popullsisë së kryeqytetit është i punësuar në bujqësi, fshatrat përreth kryeqytetit numërojnë një shifër të kënaqshme me pemë frutore dhe kafshë.

Sipas të dhënave të Institutit të Statistikave, në Bashkinë e Tiranës ka rreth 289 mijë rrënjë pemë frutore, ku dallojnë njësitë administrative Dajt dhe Shëngjergj me përkatësisht 44 mijë dhe 43 mijë pemë. Ndër këto pemë mbizotërojnë kumbullat dhe fiqtë.

Edhe më i madh është numri i ullinjve, rreth 326 mijë, ku dallojnë Zall Herri dhe Ndroqi me nga 56 mijë dhe 51 mijë rrënjë të mbjella.

Ndër kulturat bujqësore më të mbjella nuk mund të mungonte as rrushi, ku gjithsej numërohen mbi 268 mijë pjergulla, të shpërndara më së shumti në Ndroq, Dajt dhe Baldushk.

Sa i takon blegtorisë, në njësitë administrative të Tiranës, të dhënat e Drejtorisë së Bujqësisë së Tiranës për vitin 2017 flasin për rreth 246 mijë shpendë, 29 mijë dhi, 26 mijë dele, 15 mijë lopë, 11 mijë bletë dhe 168 derra.

Për shpendët, rekordin e vendos Baldushku, me mbi 37 mijë pula e gjela deti, ndjekur nga Kashari, Petrela, Zall Herri dhe Bërzhita, të cilat kanë afërsisht secila nga 22 mijë shpendë.

Bletaria është më e përhapur në zonat malore të Tiranës, kështu që NJA Dajt dhe Shëngjergj regjistrojnë numrin më të lartë të bletëve. Këto dy njësi administrative dominojnë edhe në numrin e dhive, ndërsa për delet kryesojnë Zall Bastari dhe Shëngjergji.

Sa i takon njësive me krerët më të shumtë të lopëve  kryeson Zall Herri, e cila ka dyfishin e mesatares së njësive të tjera.

Ndërkohë, si për blegtorinë, ashtu edhe për bujqësinë, numrat më të dobët i regjistron njësia administrative Krrabë, e cila mbledh edhe numrin më të vogël të fshatrave.

A.H./SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.