Bulevardi i Ri do të strehojë 100 mijë banorë – Rama: Uroj të shohim sa më shpejt kulla të reja
Ecuria e punimeve të Bulevardit të Ri të Tiranës dhe projekti për rehabilitimin e Lumit të Tiranës ishin në fokus të aktivitetit të zhvilluar në hyrje të Bulevardit, ku morën pjesë përfaqësues të Fondit të Zhvillimit të Abu Dhabit, kryeministri Edi Rama dhe kryebashkiaku Erion Veliaj.
Veliaj tha se Bulevardi është tashmë në fazën e tij të dytë ku po punohet për t’u bashkuar me Bregun e Lumit dhe shumë shpejt pritet të nisë plani për zhvillimin e zonës.
“Sot po themelojmë lagjen e parë, ku e gjithë infrastruktura, dhe në fakt ka më shumë punë nën tokë, aty ku jeni ulur, se sa mbi tokë çfarë mund të shohë syri i njeriut, për herë të parë kemi ndërtuar një shtyllë kurrizore, kemi konceptuar të gjitha blloqet. Në fund të këtij muaji zbardhet PDV-ja e të gjithë lagjes së Bulevardit të Ri, që ne besojmë do të strehojë deri në 100 mijë persona deri në fund të vitit 2050”, tha Veliaj.
Ndërkohë, kryeministri Rama tha se zhvillimi urban i zonës do të sjellë përmirësime në aspektin ekonomik dhe social.
“Do të sjellë zhvillim ekonomik dhe social, çuarja përpara e kësaj pune me fillimin të dhënies së lejeve të ndërtimit për të gjithë bllokun e ri që parashikon projekti dhe ku uroj të shohim sa më shpejt kulla të reja. Në Tiranë zhvillohet një debat idiot lidhur me pikërisht ato që janë edhe shprehjet më kuptimplota dhe më cilësore të zhvillimit të kryeqytetit të së ardhmes, e kam fjalën për ndërtimet ikonike të Tiranës, që janë kullat e parashikuara në planin francez dhe do të pasohen besoj dhe shpresoj shumë shpejt edhe me kullat e parashikuara në këtë anë të Tiranës.
Bëhet fjalë për zhvillime të domosdoshme në të gjitha aspektet: në aspektin ekonomik, në aspektin social, mjedisor dhe gjithçka thuhet lidhur me to për t’i kundërshtuar është thjesht dhe vetëm një absurditet i plotë”, tha Rama
Kryeministri shtoi se blloqet e reja të banimit, biznesit dhe argëtimit do të jenë të një cilësie më të lartë falë mundësisë që ka patur zona për t’i ndërtuar gjërat me radhë. Rama falenderoi për mbështetjen në këtë projekt Fondin e Zhvillimit të Abu Dhabit, përfaqësuesi i të cilit nga ana e tij vlerësoi partneritetin me qeverinë e Shqipërisë në realizimin e projekteve strategjike me rëndësi kombëtare.
Angelo Haruni/SCAN
Parku i ri qendror në Tiranë – Veliaj: Bashkia do të transferohet në Bulevardin e Ri
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.