Bullgaria kërkon të aplikojë monedhën euro para afateve të BE-së!

Bullgaria po avancon drejt adoptimit të monedhës euro si monedhë kombëtare, duke iu bashkuar edhe në këtë mënyrë vendeve të tjera europiane.  “Reuters” citon ministrin e Financave të Bullgarisë Vladislav Goranov që ka deklaruar se kjo mund të realizohet në janarin e vitit 2022.

E në fakt, kjo datë e thënë nga ministri bullgar i Financave është disa muaj më herët nga sa kishte parashikon Komisioneri europian për monedhën. Komisioneri Valdis Dombrovskis deklaroi me 18 janar se Bullgaria, që u anëtarësua në Bashkimin Europian në vitin 2007, do të duhet të presë sëpaku deri në mesin e vitit 2022 për t’iu bashkuar zonës euro.

Por Goranov tha se ka shumë shpresë se Bullgaria do të lejohet të futet në bllokun bankar të unionit dhe në mekanizmin ERM-2 (procesin paraprak 2 vjeçar të monedhës euro) këtë verë.

“Jam optimist se në korrik, nëse gjithçka shkon mirë, ne do të kemi një arsye që të aplikojmë për hyrjen në ERM dhe presim një rezultat pozitiv. Rruga më e shkurtër për në euro është 2 vite në ERM 2 dhe më pas një vit për rregullimet e nevojshme. Opsioni më optimist është futja e monedhës euro me 1 janar 2022” u shpreh ministri në një debat publik për adoptimin e euros.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.