Bullgaria, më shumë për rajonin – Samitet e nivelit të lartë do të mbahen çdo dy vjet

Bullgaria duket se e ka marrë më shumë se seriozisht integrimin e Ballkanit Perëndimor në Bashkimin Europian dhe po shfrytëzon maksimalisht presidencën e saj të unionit për këtë qëllim.

Së fundmi, Sofja zyrtare, në bashkëpunim me konfederatën më të madhe të sindikatave në vend,  ka organizuar një tjetër forum, me temë, të ardhurat në Ballkanin Perëndimor. Ky forum shihet si një përgatitje për forumin e datës 17 Maj.

E ftuar gjatë punimeve të forumit, ministrja e jashtme e Bullgarisë, Ekaterina Zaharieva u shpreh se, përpjekjet e Bullgarisë për integrimin e Ballkanit nuk do të marrin fund me presidencën e unionit, dhe se mbështetja ndaj këtyre vendeve do të jetë afat-gjatë. Sipas saj, fokusi ndaj Ballkanit Perëndimor do të jetë arritja më e madhe e presidencës bullgare.

Ndër të tjera, ajo shtoi se, samiti historik i 17 Majit do të bëhet traditë, pasi planifikohet që të mbahet çdo dy vite. Edhe Kroacia është angazhuar që të mbajë një forum të nivelit të lartë me Ballkanin Perëndimor gjatë Presidencës së saj, në 6-mujorin e parë të 2020.

Sa i përket temës kryesore të forumit të Sofjes, Zaharieva nënvizoi faktin se, rritja e mirëqenies së qytetarëve në rajon, dhe kryesisht të ardhurat e tyre janë thelbësore për integrimin. Për këtë duhen reformat, shtoi ajo.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.