“Bum” ndërtimi në Gjermani – 2018 do të shënojë performancën më të mirë që prej vitit 1995

Kompanitë e ndërtimit në Gjermani presin që shitjet gjatë këtij viti të rriten me të paktën 4%, duke prekur kështu nivelin më të lartë që prej vitit 1995, thotë shoqata e ndërtimit në vend, duke sinjalizuar se, ky sektor do të vazhdojë të nxisë rritjen e ekonomisë më të madhe të Europës edhe për këtë vit.

Aktualisht, Gjermania është duke shijuar një bum të ndërtimit, si pasojë e shpenzimeve të larta qeveritare për rrugë dhe ura, si dhe rritjen e investimeve të kompanive në ndërtesa por edhe si pasojë e bumit të sektorit të pasurive të paluajtshme.

Të gjithë këtë bum në sektorin e ndërtimit e ka nxitur tejmase edhe politika ultra lehtësuese e Bankës Qendrore Europiane, me normat e interesit mjaft të ulëta.

Emigracioni i lartë gjatë viteve të fundit si dhe rritja e popullsisë urbane kanë pasur gjithashtu ndikim në këtë performancë. Gjatë vitit aktual pritet kështu që shitjet e sektorit të prekin shifrën e 117 miliardë eurove, pranë niveleve të bumit të periudhës së pas ribashkimit të dy Gjermanive në vitet `90.

Vetëm për ndërtesa rezidenciale pritet që shitjet të prekin vlerën e 43 miliardë eurove. Çmimet ndërkohë projektohen të rriten me 3.5%. Edhe punësimi në sektor pritet të rritet ndjeshëm gjatë vitit.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.