Bum në fluturimet charter – Vetëm në korrik sollën 40 mijë turistë

Shtimi i popullaritetit të Shqipërisë si destinacion për pushime ka rritur kërkesat për fluturime drejt vendit tonë.

Numri i pasagjerëve që udhëtuan me fluturime charter gjatë muajit Korrik arriti në 79,311 persona, çka përbën një rritje me 42.5% krahasuar me një vit më parë. Kjo shifër përfshin si udhëtimet në hyrje (40,721 pasagjerë) ashtu edhe në dalje (38,590 pasagjerë).

Madje rritja është aq e madhe saqë numri i pasagjerëve arrin në 23% të totalit të udhëtarëve me transport ajror. Vitet e kaluara, ky raport arrinte në rreth 16% të hyrje-daljeve të Aeroportit Ndërkombëtar të Tiranës.

Në mungesë të linjave direkte ajrore, shumë tur operatorë apo linja ajrore vendosin linja periodike charter, për të dërguar turistët në vendin tonë. Ndër vendet e origjinës me grupin më të madh të pasagjerëve charter janë vendet nordike si Danimarka, Suedia dhe Finlanda, ku pjesa më e madhe e udhëtarëve e përfitojnë udhëtimin në paketat e tur operatorit Apollo.

Përmes këtyre fluturimeve në vendin tonë erdhën edhe mijëra turistë nga Izraeli, Ukraina, Rusia dhe Bjellorusia. Një tjetër arsye për rritjen e fluturimeve charter janë edhe daljet e shtetasve shqiptarë për pushime në vende si Turqia.

A.H./SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.