“Bum” shitjesh te të vegjlit – Rritje reale apo manovra të tatimpaguesve?
Biznesi i vogël ishte kontribuesi kryesor në rritjen e shitjeve në ekonomi për vitin e kaluar. Sipas të dhënave nga Instituti i Statistikave, ndërmarrjet e vogla, me më pak se katër të punësuar, dhanë një kontribut prej 1.7% në rritjen totale të shitjeve neto në ekonomi, rritje që në total për vitin e kaluar ishte 4.4%. Ndërkohë, bizneset e mëdha, me mbi 50 të punësuar, ishin kontribuesit e dytë më të mëdhenj, me 1.5% të rritjes së totale shitjeve.
Duke parë shifrat e Instat, duket se viti 2016 ishte mëse pozitiv për shitjet e biznesit të vogël, krahasuar me segmentet e tjera të biznesit. Përveçse dhanë kontributin kryesor në rritje, pesha e tyre ndaj shitjeve totale në ekonomi arriti në 15.3% të totalit, ndërsa një vit më parë kishte qenë 14.3%.
Nga këto shifra, mund të mendohet se ankesat e shpeshta se biznesi i vogël është në kufijtë e mbijetesës nuk pasqyrojnë gjendjen reale të këtyre aktiviteteve. Nëse duam t’i lexojmë shifrat me optimizmin e qeverisë, një argument mund të jetë se heqja e tatimit mbi të ardhurat mbi biznesin e vogël dhe fushatat kundër informalitetit mund të kenë rritur vlerat e shitjeve që bizneset e vogla raportojnë, qoftë edhe përmes anketimeve.
Megjithatë, vetë pragu përjashtues i tatimit mbi të ardhurat mund të jetë një shpjegim më realist i rritjes së shitjeve te biznesi i vogël. Pas vendosjes së tatimit të përshkallëzuar mbi pagat, shumë profesionistë ndryshuan statusin, nga të punësuar në të vetëpunësuar, për të paguar më pak tatime. Një taktikë të ngjashme ndoqën bizneset e përmasave të mëdha apo të mesme. Ato hapën aktivitete të reja, me qëllim copëzimin e shitjeve në disa biznese të vogla, për të përfituar përjashtim nga tatim-fitimi.
Jo rastësisht, numri i bizneseve të vogla u rrit me mbi 13 mijë për vitin 2016. Duket se kjo taktikë e ndjekur nga të punësuarit dhe nga bizneset e mëdha ka sjellë një rritje fiktive të shitjeve për segmentin e biznesit të vogël.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.