“Bum” turistësh shqiptarë në Greqi – Në rritje me 23%, 186.5 mln euro shpenzime në vetëm 9 muaj
Shqiptarët janë ndër popujt që kanë pësuar rritjen më të madhe në Greqi, si turistë. Të dhënat i bën me dije Banka Qendrore e Greqisë, nëpërmjet bilancit të pagesave.
Shifrat më të fundit, të përpunuara nga Scan, i referohen periudhës Janar-Shtator të vitit të kaluar dhe tregojnë se shqiptarët si turistë kanë shpenzuar 186.5 milionë euro në vendin fqinj, në rritje me 23% në krahasim me të njëjtën periudhë të vitit 2017.
Në terma rritje, shqiptarët janë të 7-tët në botë, me spanjollët që kryesojnë klasifikimin me 39.7%. Në terma shifrash absolute, shqiptarët janë të 17-tët në listë.
Përgjatë të gjithë vitit 2017, Greqinë e vizituan për turizëm 829 mijë shqiptarë, të cilët shpenzuan 190 milionë euro në total, pra thuajse sa e gjithë shifra e 9-mujorit të 2018-ës, dhe zinin vendin e 19-të.
229 euro për frymë ishte shpenzimi mesatar gjatë 2017-ës, ndërkohë që për 2018 shifra pritet të rritet ndjeshëm në varësi edhe të numrit të turistëve.
Me 3.9 ditë qëndrim mestar në vendin fqinj, shqiptarët në 2017—ën shpenzuan 59 euro në ditë.
Të dhënat zyrtare nga vendi fqinj tregojnë se shqiptarët janë të vetmit ndër vendet e Ballkanit Perëndimor që e preferojnë Greqinë për turizëm. Dhe vit pas viti këto shifra po rriten ndjeshëm.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.