Bumi i gjyqeve, ATP nuk i ndjek dot – Raporti për 8-mujorin: Nga 598 padi të pronarëve, kemi ndjekur 177 nëpër gjykata
Fluksi i paralajmëruar i padive nga pronarët duket se është i pamundur të ndiqet nga Agjencia e Trajtimit të Pronave. Scan Televizion ka zbardhur raportimin e Agjencisë mbi situatën e ndjekjes së gjyqeve për tetë muajt e parë të vitit, ku theksohet se për pjesën më të madhe të seancave specialistët e saj nuk kanë qenë të pranishëm gjatë gjykimeve, por i kanë ndjekur ato në rrugë shkresore.
“Ju informoj se ne 8 -mujorin e vitit 2020 nga ana e Sek. Përfaqësimit Ligjor jane ndjekur 177 çështje te cilat jane regjistruar prane ATP-se gjate kesaj periudhe ne Gjykatat e Tiranes, ku përfshihen Gjykata e Shkalles se Pare Tirane, Gjykata e Apelit Tirane, Gjykata Administrative e Shkalles se Pare Tirane dhe Gjykata Administrative e Apelit . Ne Gjykatën e Shkalles se Pare dhe te Apelit Tirane jane ndjekur çështje qe kane te bejne me njohjen e te drejtes se pronesise ndërsa ne gjykatat administrative jane ndjekur ceshtje qe kane si objekt vlerësimin e prones se njohur per kompensim me vendim administrative apo gjyqësor.
Referuar te dhënave te raportuara rezulton se fluksi I padive ka pësuar ulje. Gjithashtu gjate 8 -mujorin e vitit 2020 ne kete sektor janë administruar 598 padi nga te gjitha gjykatat e vendit ku përfaqësuesit e ATP-se pavarësisht se nuk kane marre pjese fizikisht kane kryer procedurat ne mënyrë shkresore përfshirë ankimet dhe rekurset ku ka qene e nevojshme”, shkruhet në raportimin e Agjencisë së Trajtimit të Pronave drejtuar Ministrisë së Drejtësisë.
Ndërkohë që është vetë Agjencia ajo që parashikon që fluksi i padive të vijojë në rritje, duke bërë me dije se 6,950 pronarë mund t’i drejtohen gjykatave në vijim pasi kërkesat e tyre nuk kanë marrë përgjigje nga kjo e fundit.
Ndërkaq, një numër shumë i madh padish të ngritura nga pronarët presin prej vitesh nëpër gjykata, veçanërisht në atë të Lartën. Ndërkohë që sipas parashikimeve, paditë do të vijojnë për shkak të shifrave shumë të larta që pretendojnë pronarët nga shteti. Vetëm Agjencia e Trajtimit të Pronave ka vlerësuar se se fatura financiare për kompensimin e pronarëve arrin në 101 miliardë lekë, afërisht 1 miliardë dollar, ndërkohë që shoqatat e pronarëve pretendojnë një vlerë rreth 4 herë më të madhe.
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.