Bundesbank rrëzon ekonominë gjermane – Ul projeksionet e rritjes në 0.6% këtë vit, nga 1.6% që ishin
Banka Qendrore e Gjermanisë ka rrëzuar tërësisht projeksionet për rritjen e ekonomisë më të madhe të Europës. Tashmë, sipas Bundesbank, rritja ekonomike e Gjermanisë projektohet në 0.6%, ndërkohë që në muajin dhjetor vlerësohej në 1.6%. Projeksionet për ecurinë e çmimeve të konsumit për këtë vit ndërkohë mbeten të pandryshuara, në 1.4%, bindshëm poshtë objektivit të Bankës Qendrore Europiane, pranë dhe më poshtë se 2%.
Gjermania prej vitesh ka qenë lokomotiva e ekonomisë europiane, ndërsa sot po kthehet gradualisht në problemin më të madh të saj. Çdo ngadalësim në Gjermani përkthehet në dhembje koke edhe në cepin më të largët të Europës. Sot, Gjermania kërcënon të minojë rimëkëmbjen aq të vështirë ekonomike të bllokut të monedhës së përbashkët europiane. Sipas Bundesbank, rritja ekonomike, nga 0.6% këtë vit, projektohet të ngjitet në 1.2% vitin e ardhshëm, nga 1.6% që vlerësohej më parë.
“Ekonomia gjermane aktualisht po përjeton një periudhë ftohje”-thotë banka qendrore në vend, duke shtuar se kjo situatë vjen kryesisht si rrjedhojë e ngadalësimit të industrisë, me eksportet që po japin pasojat e para.
Roel Korkuti / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.