Bursa kineze, në rënie të pjerrët – Prek nivelin e 2014-ës, bën kontrast me tregjet globalë
Rënia e bursave kineze vazhdon të prekë rekorde të reja, ndërkohë që indeksi i titujve të kapitalit në Shangai arriti nivelin më të ulët që prej vitit 2014. Indeksi i Shangait ra me 1.1% në 2,651.7 pikë, duke thyer nivelin e ulët të Janarit 2016. Rënia e qëndrueshme tregon se ndjesia për aksionet kineze nuk është rimëkëmbur nga kolapsi i 2016-ës. Fitimet e kompanive janë tkurrur dhe disa po tërhiqen nga financimi nëpërmjet aksioneve, duke u detyruar që të rrisin borxhin.
Indeksi benchmark i Shangait po shkon drejt humbjeve për 4 tremujorë radhazi, që është periudha më e gjatë e rënies që prej vitit 2008. Trazirat në titujt e kapitalit në Kinë bëjnë kontrast me aksionet e tjera në të gjithë botën. Indeksi MSCI All-Country World Index, tregues që mat titujt e kapitalit në të gjithë botën, ka shtuar 21% që prej Nëntorit 2014, ndërsa S&P 500, i ka dhuruar investitorëve një rritje prej 40%. Tensionet tregtare me SHBA përbëjnë një burim shqetësimi për investitorët.
Sipas analistëve, është e vështirë që të blesh aksione kineze, pavarësisht rënies që i ka bërë këto më të lira. Rënia e juanit i ka bërë gjithashtu aksionet e vendit më pak tërheqëse. Valuta kineze ka rënë me 7% që prej fundit të muajit mars, kryesisht prej luftës tregtare. Rënia e tregut të aksioneve në Kinë ka gjasa të devijojë vëmendjen te asete të tjera spekuluese si tregu i pronave, duke vënë në rrezik përpjekjen e Qeverisë për të kthyer tregun e aksioneve në një bazë të qëndrueshme të financimit për kompanitë.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.