Bursa për të rinjtë, Veliaj: Përfituan mbi 2 mijë nxënës, praktika vazhdon

Bashkia e Tiranës ka rikthyer bursat për nxënësit e shkëlqyer duke shpërndarë rreth 2228 bursa për 2016-n, praktikë që do të vazhdojë edhe në vijim.

Kështu është shprehur kryebashkiaku Erion Veliaj, i pranishëm në aktivitetin e zhvilluar në Shkollën e Mesme të Bashkuar në Mullet ku për herë të parë, “Tirana Art Fest” ka nisur audicionet e saj edhe në gjimnazet në periferi të kryeqytetit.

Veliaj theksoi se nuk do të ketë diferencime mes të rinjve që jetojnë në qendër të Tiranës dhe atyre që jetojnë në periferi, ashtu sikurse nuk do të ketë favorizime edhe për investimet.

“Në qoftë se i vë qëllim vetes diçka, besoj se secili prej nesh e ka mundësinë që t’ia dalë. Besoj se talenti është i shpërndarë kudo dhe nuk mund të kemi disa aktivitete vetëm për qytetin, kurse zonat rurale t’i lëmë jashtë. Asnjë djalë ose vajzë në Tiranë nuk duhet të ndihet i disavantazhuar, se mund të ketë një mbiemër të panjohur, se mund t’i ketë prindërit me të ardhura modeste, se mund të mos ta ketë shtëpinë në bllok”, theksoi Veliaj.

Bashkia  e Tiranës po i jep prioritet të rinjve jo vetëm në aktivitete kulturore por edhe në investime, në ndërtimin e hapësirave argëtuese për këtë kategori.

Elisabeta Dosku/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.