Bursat, javë rekord – Në Europë shkëlqejnë bankat, tregjet amerikane në eufori

Wall street ka mbyllur një javë rekord, së bashku me sektorin bankar në Europë.

Tregjet amerikane kanë marshuar gjatë javës falë pritshmërive për reformën fiskale në Shtetet e Bashkuara të Amerikës, një premtim ky i trumbetuar vazhdimisht nga presidenti Donald Trump.

Senati amerikan e ka aprovuar buxhetin federal për vitin e ardhshëm dhe që përfshin shkurtime taksash në masën e 1500 miliardë dollarëve në harkun e një dekade.

Ky votim, sipas analistëve është fillimi i diskutimit për reformën fiskale, gjë që ka çuar tregjet në eufori. Dollari është forcuar ndjeshëm për rrjedhojë, edhe pritshmëritë për Rezervën Federale dhe vendimet e ardhshme në drejtim të politikave monetare kanë pasur impakt në ecurinë e tregjeve gjatë javës.

Dow Jones, për herë të parë në histori ka tejkaluar kutoën e 23 mijë pikëve. Sa i përket Europës ndërkohë, protagoniste të padiskutuara kanë qenë bankat.

Në nivel europian, sektori ka qenë ndër performuesit më të mirë, me indeksin që u rrit me 1.1%m së bashku me sektorin e kompanive të sigurimit.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.