Bushati në Suedi: Reforma në drejtësi, prioritet kryesor për integrimin dhe thithjen e investimeve
Gjatë vizitës së tij në Suedi Ministri për Evropën dhe Punët e Jashtme, Ditmir Bushati, pati një takim me Kryetaren e Komisionit për BE-në parlamentin suedez, Karin Enström.
Gjatë këtij bashkëbisedimi vëmendje të veçantë pati procesi i integrimit të Shqipërisë në BE, duke ndarë mendimin për rëndësinë që ka politika e zgjerimit në vendet e rajonit të Ballkanit dhe procesin e reformave në të.
Znj. Enström rikonfirmoi qëndrimin suedez për anëtarësimin e rajonit, përfshirë Shqipërinë, në Bashkimin Evropian bazuar në mëritë dhe plotësimin e kritereve për këtë qëllim.
Gjithashtu gjatë vizitës së tij në Suedi, Ministri Bushati zhvilloi një takim me Sekretarin e Shtetit në Ministrinë e Drejtësisë dhe Migracionit, Lars Westbratt.
Ministri Bushati e njohu Sekretarin e Shtetit Westbratt me ecurinë e reformave përafruese me BE, duke u ndalur veçanërisht në reformën në drejtësi, si prioritet kryesor jo vetëm në rrugën e integrimit evropian të Shqipërisë, por dhe për qytetarin shqiptar dhe thithjen e investimeve të huaja në vend.
“Shqipëria po zbaton një reformë gjithëpërfshirëse të drejtësisë që adreson mangësitë e deritanishme në lidhje me pavarësinë, llogaridhënien, efikasitetin dhe profesionalizmin e sistemit të drejtësisë. Zbatimi i legjislacionit tashmë në fuqi po zhvillohet me një ritëm të qëndrueshëm, si dhe po punohet për zbatimin e procesit të “Vetting-ut” në të gjitha nivelet”, vuri në dukje Ministri Bushati.
V.H/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.