Bushati takon ministrin për Investimet e Huaja të Maqedonisë – Projektet që do të diskutohen në mbledhjen e ardhme mes dy qeverive
Ministri i Punëve të Jashtme Ditmir Bushati ka zhvilluar një takim gjatë ditës së sotme me ministrin për Investimet e Huaja të Maqedonisë, Ramiz Merko. Rritja e bashkëpunimit ekonomik dhe mënyrat për të shfrytëzuar maksimalisht potencialin ekzistues ndërmjet Shqipërisë dhe Maqedonisë ishin në fokus të takimit.
Nxitja e projekteve infrastrukturore dhe energjitike, përforcimi i bashkëpunimit ndërkufitar, me impakt në aksin zhvillimor mes dy vendeve dhe ndërlidhjen e rajonit, mbeten përparësi dhe objektiv kryesor në mbledhjen e ardhshme mes dy qeverive.
Gjatë takimit u vlerësua roli konstruktiv i faktorit politik shqiptar në qeverinë e re, si edhe kontributi i vazhdueshëm europianizues i popullsisë shqiptare ndaj interesave të vendit.
Në këtë kontekst, dy ministrat theksuan njëkohësisht se përshpejtimi i Ligjit për Përdorimin e Gjuhëve dhe i të gjitha hapave të tjerë ligjorë brenda Planit 3-6-9 për forcimin e kohezionit social dhe arritjen e barazisë ndëretnike janë parakusht për avancimin e perspektivës euro-atlantike të Maqedonisë.
Osman Dedja/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.