Butrinti i jepet privatit? – Ministria e Kluturës kërkon decentralizim të menaxhimit. Në tryezë 2 variante
Menaxhimi i Parkut Kombëtar të Butrintit parashikohet t’i jepet privatit”. Referuar dokumenti të nxjerrë për konsultim publik nga Ministria e Kulturës, studio që ka hartuar projektin kërkon decentralizimin e këtij shërbimi, ndërsa merr në konsideratë 2 variante e më konkretisht decentralizimin e plotë ose atë hibrid.
Varianti i parë nënkupton që siti dhe të gjitha asetet e tij transferohen nën kujdesin e plotë të privatit. Ndërkohë që, decentralizimi hibrid parashikon që përgjegjësia i delegohet trustit ose fondacionit, së bashku me disa asete, ndërsa të tjerat mbeten përgjegjësi e shtetit.
Në dokument shtohet se modeli i dytë është më i përdorshëm , ndërkohë që listohen edhe disa përfitime dhe risqe që lindin nga decentralizimi i këtij shërbimi.
Kështu, shumica e përfitimeve të lidhura me decentralizimin shihen në spektrin afatgjatë dhe shprehen në kuadër të: Zhvillimit të sitit dhe përmirësimit të vazhdueshëm të cilësisë së tij, aftësimit të stafit, për të përmbushur potencialin e tyre në periudhën afatgjatë dhe investimeve domethënëse në sit, nëpërmjet financimit të jashtëm, që zakonisht nuk është i disponueshëm nga shteti.
Po ashtu, kjo formë menaxhimi ofron sigurimin e së ardhmes së suksesshme ekonomike për sitin, e bazuar te planifikimi i duhur i biznesit dhe menaxhimi financiar.
Ndërkaq, në këto modele menaxhimi janë konstatuar rreziqe, sikurse është zhvillimi me ritëm të shpejtë që e çon sitin në atë nivel ku modeli i tij i biznesit nuk mund ta mbështesë më, stanjacioni i financimit bazë, duke i çuar të ardhurat që kërkohen nga burime të tjera në nivele realisht jo të arritshme apo mbështetje e tepruar në financimet e jashtme të projektit, që, në rast se financimi mbaron, i vendos në rrezik veprimtaritë.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.