Buxheti 2018, Sindikatat e Arsimit: Pagat e mësuesve të rriten me 10%. Të jepet shpërblimi i fundvitit! Nikollaj kërkon krijimin e statusit
Komisioni për Edukimin dhe Mjetet e Informimit Publik zhvilloi seancë dëgjimore për diskutimin në parim të pr.ligjit për buxhetin e vitit 2018, ku të pranishëm ishin përfaqësues nga Federata e Sindikatave të Arsimit dhe Shkencës të Shqipërisë, nga Sindikata e Pavarur e Arsimtarëve dhe Konfederata e Sindikatave të Shqipërisë.
Përfaqësuesi nga Sindikata e Arsimit, Stavri Liko kërkoi në Komison që pagat të rriten me 40 për qind deri në fund të mandatit qeverisës, por njëkohësisht kërkoi edhe kthimin e shpërblimit të fundvitit për mësuesit.
“Rritja me 5,6% e buxhetit përmirëson disa zëra. Shihet dhe plotësimi i disa kërkesave të sindikatave. Duam mbështetjen për krijimin e shanseve të barabarta dhe duhet të rritet GDP për arsimin sepse gjithmonë është ulur ky tregues, është më i ulëti në të gjithë rajonin, sipas nesh. Duhet të arrijë deri në 4 %. Te rriten pagat me 40% deri në fund të këtij mandati, rritja me 5% është e pamjaftueshme. Të vihet në funksion shpërblimi i mësuesve. Ndaj duhet t’i kthehet mësuesve shpërblimi vjetor në fund të vitit. Kanë qenë tre forma për 13 vite me radhë, ndërkohë që nga 2013 është hequr dhe shpërblimi i fundvitit. Insistojmë të jepet ky shpërblim, pasi ky është simbolik për mësuesit. Tekstet shkollore duhet të jepet për të gjithë arsimin bazë nga klasa e parë në të nëntën”, u shpreh Liko.
Në të njëjtën ide ka qenë edhe kryetari i Sindikatës së Pavarur të Arsimit të Shqipërisë, Nevruz Kaptelli, i cili kërkoi që buxheti për arsimin të rritet me 5 për qind të GDP, ndërkohë sipas rritja e pagave për mësuesit të jetë 10 për qind.
“Rritja e cilësisë se mësimdhënies është e lidhur me rritjen e pagës. Kërkesa jonë është që të rritet buxheti për arsimin deri ne 5% të GDP. Për mësuesit përfshirë edhe ata të shkollave profesionale në buxhet të parashikohet rritja e pagës deri ne 10 %. Kërkojmë dhënien e librave falas nga klasa parë deri në të nëntën. Jemi të shqetësuar për fenomenin e braktisjes së shkollës, dhënia e librave falas do e zbusë këtë fenomen. Të parashikohet fondi i veçantë për trajnimin e mësuesve. Nga ana tjetër për nxënësit me aftësi të kufizuar duhet të rritet buxheti, po kështu edhe për mësuesit ndihmës në shkolla. Problem mbetet dialogu mes MASR. Të ndërmerren hapa ligjore për kontratat e punës, për 36 mijë mësues”.
Kryetari i Konfederatës së Sindikatave të Shqipërisë, Kol Nikollaj foli edhe për nënshkrimin e kontratave kolektive.
“I kemi rrugët ligjore të hapura për të nënshkruar kontratat kolektive dhe do e arrijmë. Presim strukturat e qeverisë sepse nuk mund të kalojmë në grevë pa kaluar në këto zyra. Nëse nuk zgjidhet do jemi ne Bulevard. Do luftojmë për pagën e 13 dhe të drejtat e tjera, përfshirë transportin. Tekstet falas i kërkojmë për arsimin 9 vjeçar”.
Deputeti i PD, Luçiano Boçi iu kundërpërgjigj Nikollajt duke thënë se: “Nuk është momenti i duhur për nënshkrimin e kontratave kolektive, përdorni format organizative, bashkohuni dhe i kërkoni qoftë edhe me protesta. Ministria nuk ka detyrim ligjor dhënien e pagës së 13, përcaktoni formulën për pagën e 13. Nuk ka rritje në buxhetin e arsimin 3,4, rritja reale është 2,4%. Sporti nuk është rritur, tekstet falas janë akoma projekt pilot”.
Nga ana tjetër Boçi ka pyetur kreun e Konfederatës së Sindikatave nëse i ka kërkuar zgjidhje MARS për humbjen e vendeve të punës në radhët e mësuesve nga bashkimi i klasave apo mbyllja e shkollave. Nikollaj u përgjigj se kjo do të marrë zgjidhje, ndaj pohoi se qeveria duhet të bëjë statusin për arsimtarët, pasi sipas tij profesioni i mësuesit është i rregulluar me ligj.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.