Buxheti 2021 rikthen optimizmin! Drafti/ 65 mln euro për rritje pagash në shëndetësi dhe arsim, të ardhura më të larta

Pavarësisht dy goditjeve të njëpasnjëshme që ekonomia shqiptare mori si pasojë e tërmetit të 26 nëntorit dhe pandemisë COVID-19, projektbuxheti për vitin 2021 parashikon rimëkëmbje ekonomike.

Referuar draftit ,  i cili ka kaluar në qeveri, të ardhurat totale të buxhetit të shtetit parashikohen të arrijnë 479 miliard lekë, nga këto, të ardhurat tatimore 437 miliard lekë dhe brenda zërit të të ardhurave tatimore, të  ardhurat që mblidhen nga tatimet dhe doganat 311 miliard lekë. Ndërkohë, të ardhurat nga kontributet planifikohen 99,7 miliard lekë.

Krahasuar me të pritshmin e vitit 2020, të ardhurat gjithsej të buxheti të shtetit rriten 10.6 %, ndërkohë që të ardhurat tatimore nga tatimet dhe doganat programohen të rriten 12.2 %. Nga ana tjetër shpenzimet publike për vitin 2021 janë planifikuar në 587.6 miliardë lekë ose 34.9% e PBB.

Qeveria ka programuar skemën e mbështetjes së fermerëve, programet e nxitjes së punësimit, skemat për mbështetjen e zhvillimit ekonomik dhe zhvillimi i sportit.

Ndërkohë që është programuar një politikë të re e rritjes së pagave për dy sektorët prioritarë shëndetësi dhe arsim. Fondi vjetor për rritjen e pagave është planifikuar në shumën 8 miliardë lekë dhe parashikon rritjen e pagës për funksion me 40% për punonjësit shëndetësor, me një vlerë prej 4.5 miliardë lekë dhe rritjen e pagës për funksion me 15% për punonjësit mësimor me një vlerë prej 3.5 miliardë lekë.

Gjithashtu, si politikë e re për vitin 2021 është miratuar dhe një fond prej 1 miliardë lekësh në formën e skemës së mbështetjes së fermerëve përmes përjashtimit të karburantit për prodhim bujqësor nga akciza, taksa e qarkullimit dhe taksa e karbonit.

Për vitin e ardhshëm, rritja ekonomike parashikohet në në 5.5 përqind, investimet publike në 7.2% e PBB, defiçiti buxhetor planifikohet të jetë në nivelin 6.5% të PBB, ndërsa borxhi publik pritet të zbresë në 78.6 për qind.

Elisabeta Dosku/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.