Buxheti, 264 milionë euro me humbje – COVID-19 vijon të lërë pasoja, rikthehet shpresa e konsumit në Korrik
Pandemia Covid-19-, vijon të lërë gjurmët e veta në buxhetin e shtetit, pavarësisht rihapjes totale të ekonomisë. Në 7 muajt e parë të vitit buxheti i shtetit ka mbledhur 233.1 miliardë lekë, duke bërë që të ardhurat të kenë një rënie me 32.7 miliardë lekë apo 264 milionë euro në raport me të njëjtë periudhë të një viti më parë. Po ashtu në raport me planin e rishikuar për periudhën, buxhetit i mungojnë afro 190 milionë euro.
Megjithatë ndryshe nga muajt e parë, duket se në Korrik ka filluar rigjallërimi i ekonomisë, pasi niveli i arkëtimeve ka qenë maksimali përgjatë gjithë vitit, me afro 38 miliardë lekë. Nga tatimet dhe doganat janë mbledhur rreth 150 miliardë lekë apo 27 miliardë më pak se një vit më pare. Të gjithë treguesit nga ky zë rezultojnë më rënie, si TVSH-ja që është tregues direkt i konsumit, ku rezultojnë të jenë mbledhur 8.6 miliardë lekë më pak se 7-mujori i 2019-ës, Tatimi mbi fitimin me 7.1 miliardë lekë më pak, akcizat 2.1 miliardë lekë minus, tatimi mbi të ardhurat personale 6.9 miliardë lekë më pak dhe taksat nacionale paraqiten me 2.7 miliardë lekë më pak dhe ato doganore që paraqiten me një rënie të lehtë.
Me një rënie prej rreth 2.1 miliardë lekësh paraqiten edhe të ardhurat nga pushteti vendor, në raport me 2019, ku janë mbledhur në total afro 13 miliardë lekë. Nga ana tjetër shpenzimet janë rritur me afro 10 miliardë lekë në raport me një vit më parë, duke u regjistruar në 282 miliardë lekë, ndërsa ato kapitale rezultojnë në 35.2 miliardë lekë, me një rritje të lehtë me afro 1 miliardë lekë në krahasim me 7-mujorin 2019. Defiçiti buxhetor gjatë kësaj periudhe arrin shifrën e 49 miliardë lekëve.
Të ardhurat nga tatimet dhe doganat
7 mujori 2019 177 miliardë
7-mujori 2020 150 miliardë lekë
Të ardhurat në buxhet
TVSH 69.9 miliardë lekë
Tatimi mbi fitimin 15.4 miliardë lekë
Akcizat 23.9 miliardë lekë
TAP 19.1 miliardë lekë
Taksat nacionale 18.2 miliardë lekë
Elisabeta Dosku / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.