Buxheti i Arsimit, në rritje – 39 miliardë lekë për 2019-ën. Më shumë financim për arsimin bazë
Buxheti për Ministrinë e Arsimit, Sportit dhe Rinisë rezulton në rritje të lehtë edhe për vitin 2019.
Vitin e ardhshëm, buxheti i kësaj ministrie do të rritet me 1 miliardë lekë dhe në total përllogaritet në shumën prej 39 miliardë lekë nga 38 miliardë që ishte në vitin 2018. Pjesën dërrmuese të shpenzimeve, ashtu sikurse edhe për vitin 2018, vitin e ardhshëm e zë arsimi bazë, përfshirë edhe arsimin parashkollor me 22 miliardë lekë, i ndjekur nga arsimi universitar me 7.4 miliardë lekë dhe ai i mesëm me 7.2 miliardë lekë.
Zhvillimi i Sportit dhe Rinisë dhe shkenca janë sektorët më pak të privilegjuar sa i takon buxhetit për vitin e ardhshëm për të cilin janë alokuar nivelet më të ulëta të fondeve, deri në 500 milion lekë për Sportin dhe Rininë dhe 620 milion lekë për Shkencën. Ajo që vihet re është se rritja e buxhetit nga viti në vit për arsimin ka qenë ndër më të ulëtat krahasuar me ministritë e tjera. 34 miliardë ka qenë buxheti në 2017, 38 miliardë në 2018 dhe 39 miliardë në 2019. Fondet për secilin sektor rezultojnë se kanë ndryshuar me një shumë të papërfillshme ç’ka tregon se edhe për vitin 2019 buxheti për këtë ministri nuk premton shumë.
Nertila Doko/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.