Buxheti i balancuar s’bën për Italinë! Di Maio: Heqja e klauzolës përfshihet në marrëveshjen e koalicionit
Italia duhet të heqë një klauzolë në Kushtetutë, që e detyron të mbajë një buxhet të balancuar, sipas zv/kryeministrit Luigi Di Maio, i cili shton se qeveria nuk ka punuar ende për këtë çështje.
Di Maio tha se heqja e kësaj klauzole ishte kusht i një “kontrate” të hartuar nga koalicioni qeverisës, që përbëhet nga partia e tij Lëvizja 5-yjet dhe Lega Nord. Ai tha se Qeveria po përqendrohet tashmë në mbajtjen e premtimeve për të garantuar të ardhura minimale për të varfërit, uljen e taksave dhe reformat në sistemin e pensioneve, në mënyrë që të ulët koha e daljes në pension.
Amendimi në Kushtetutë i buxhetit të balancuar u miratua nga Parlamenti në Prill 2012, gjatë krizës së borxhit të Eurozonës, nën qeverinë e Mario Montit. Masa u prezantua një vit më parë nga Berlusconi, në përpjekje për të qetësuar tregjet financiarë, ndërkohë që kostot e huamarrjes së Italisë u rritën ndjeshëm.
Klauzola u bë efektive në vitin 2014, por që prej atëherë, Italia nuk ka arritur ende një buxhet të balancuar dhe parlamenti ka votuar që të bëjë përjashtime të përkohshme çdo vit , për të miratuar planet e shpenzimeve të Qeverisë.
Administrata e re e krijuar nga dy partitë populiste, bën të ditur se mënyra më e mirë për të ulur borxhin publik është duke investuar më shumë për të nxitur rritjen ekonomike, se sa duke u përpjekur që të mbahet një ekuilibër në buxhet çdo vit.
Marrëveshja mes partive bënte të ditur se rregulli i buxhetit të balancuar duhet ndryshuar për shkak se e bën të pamundur që të adaptohen politika efektive anti-ciklike. Megjithatë, Kryeministri Giuseppe Conte, deklaroi se “qeveria nuk ka plan të heqë klauzolën e buxhetit”.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.