Buxheti/ Kush thotë të vërtetën? – Ahmetaj dhe KLSH përplasje shifrash për deficitin dhe borxhin
Ministria e Financave dhe Kontrolli i Lartë i Shtetit janë përplasur sa i takon shifrave për deficitin dhe borxhin të pasqyruara në buxhetin faktik të vitit 2017 në Komisionin Parlamentar të Ekonomisë dhe Financave.
Në mungesë të kreut të KLSH-së, Bujar Leskaj, i cili ka preferuar të mos jetë prezent për shkak se i ka mbaruar mandati, Ministri i Financave Arben Ahmetaj ka kthyer përgjigje për raportin e publikuar, duke thënë se shifrat e institucionit që ai drejton janë të skanuara nga Fondi Monetar Ndërkombëtar dhe 2017-ta ishte viti i parë elektoral që shënoi ulje të borxhit.
Por ajo që ra në sy në Komision, ishte largimi i kryetarit Erion Braçe, përreth 30 minuta që nga nisja e fjalës së ministrit.
Por pavarësisht raportimit të gjatë të ministrit Ahmetaj, përfaqësuesja e KLSH-s ka rilexuar edhe njëherë raportin, duke nxjerr në pah se financat fshehin shpenzimet dhe detyrimet e prapambetura për të ulur nivelin e borxhit dhe deficitit. Ndërsa dëmi që llogarit KLSH është thuajse gjysma e buxhetit të shtetit.
Në fund, pavarësisht mospërputhjes së theksuar në shifra, Komisioni i Ekonomisë dhe Financave ka miratuar buxhetin faktik të vitit 2017, ndërsa sërish, si rrallë herë, ra në sy mungesa e pyetjeve nga kryetari i komisionit, Erion Braçe.
Elisabeta Dosku/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.